গুৱাহাটী, ২৭ ডিচেম্বৰ: দল বিৰোধী কাৰ্যকলাপত লিপ্ত হোৱাৰ বাবে বিজেপিৰ পৰা বহিষ্কাৰ কৰা হৈছে ১৬ জনকৈ কৰ্মকৰ্তাক । দলীয় প্ৰাৰ্থিত্বৰ বিপৰীতে নিৰ্দলীয় ৰূপে নিৰ্বাচনত অৱতীৰ্ণ হোৱাৰ বাবে ডিমা হাছাওৰ ১৬ জনকৈ কৰ্মকৰ্তাক দলৰ পৰা বহিষ্কাৰ কৰা হৈছে । ডিমা হাছাও স্বায়ত্তশাসিত পৰিষদৰ নিৰ্বাচনক কেন্দ্ৰ কৰি বিজেপিত সৃষ্টি হোৱা প্ৰাৰ্থিত্বকেন্দ্ৰিক সংঘাতৰ মাজতে দলটোৰ ৰাজ্যিক সভাপতি ভৱেশ কলিতাই এক নিৰ্দেশনাৰ জৰিয়তে ১৬ জন লোকক দলৰ পৰা বহিষ্কাৰ কৰিছে ।
উল্লেখ্য যে এই ১৬ গৰাকী কৰ্মকৰ্তাই দলীয় টিকটৰ পৰা বঞ্চিত হৈ নিৰ্দলীয়ভাৱে নিৰ্বাচনত প্ৰতিদ্বন্দিতা কৰিছে । যাৰ বাবে তেওঁলোকক দলৰ পৰা বহিষ্কাৰ কৰা হৈছে । বহিষ্কাৰ হোৱা এই কৰ্মকৰ্তা তথা নেতাসকলৰ ভিতৰত কেইবাজনো প্ৰাক্তন ই এম আৰু বিজেপিৰ যুৱ মৰ্চাৰ নেতাও আছে । বিজেপিৰ ৰাজ্যিক সভাপতি ভৱেশ কলিতাই জাৰি কৰা নিৰ্দেশনাৰ ভিত্তিত বহিষ্কাৰ হোৱা নেতাসকল হৈছে ক্ৰমে:
- জাতিংগা সমষ্টিৰ লামমেথিয়েম টিউল
- মাহুৰ সমষ্টিৰ ৰাহুল নাইডিং
- চিলভিয়াছ এল খজুল
- হাংৰুম সমষ্টিৰ পি বি নেওমে
- লাইচন সমষ্টিৰ পি জেমি
- কালাছান্দ সমষ্টিৰ প্ৰণেন হাফলংবাৰ
- ৱাজাও সমষ্টিৰ পুনুছ নুনিছা
- হাতীখালী সমষ্টিৰ বিমল হোজাই
- হাতীখালী সমষ্টিৰ হেমন্ত কেম্প্ৰাই
- গৰমপানী সমষ্টিৰ জয়ছিং দুৰং
- গৰমপানী সমষ্টিৰ দৰমেন ইংহি
- দিহামালাই সমষ্টিৰ আৰ জেমি
- ল'ৱাৰ খাৰ্টঙৰ লালৰপুই মাৰ
- ২৬ নং দলং সমষ্টিৰ এছ ৰাংখ'ল
- দিগেৰ সমষ্টিৰ জয়দেশ ফংলো
- চেমখৰ সমষ্টিৰ হেৰজিৎ জিদুং
উল্লেখ্য যে ডিমা হাছাও স্বায়ত্তশাসিত পৰিষদীয় নিৰ্বাচনত বিজেপিয়ে প্ৰচাৰ অভিযান তীব্ৰতৰ কৰি তুলিছে । ৰাজ্যিক সভাপতি ভবেশ কলিতা, মন্ত্ৰী পীযুষ হাজৰিকাৰ লগতে কেইবাজনো বিধায়ক আৰু দলৰ জ্যেষ্ঠ কাৰ্যকৰ্তাৰ অংশ গ্ৰহণেৰে এই প্ৰচাৰ অভিযানৰ কাৰ্যসূচী শক্তিশালী কৰি জনসাধাৰণৰ সমৰ্থনৰ হকে বিভিন্ন কাৰ্যসূচী গ্ৰহণ কৰা হৈছে ।
