গুৱাহাটী, ১২ এপ্ৰিল: ৰাজ্যৰ সদ্যসমাপ্ত বিধানসভা নিৰ্বাচনত কংগ্ৰেছ দলৰ সকলো ৰণকৌশল যুগুতোৱা দলটোৰ দুগৰাকী ৰাষ্ট্ৰীয় নেতা হঠাৎ গুৰুত্বপূৰ্ণ হৈ উঠিছে । এই দুই নেতাৰ এগৰাকী হৈছে ছত্তিশগড়ৰ মুখ্যমন্ত্ৰী ভূপেশ বাঘেল আৰু আনজন ৰাজস্থানৰ শীৰ্ষ কংগ্ৰেছ নেতা তথা নিখিল ভাৰত কংগ্ৰেছ কমিটিৰ সাধাৰণ সম্পাদক জিতেন্দ্ৰ সিং । মন কৰিবলগীয়া দিশটো হ'ল, অসমৰ বিধানসভা নিৰ্বাচনৰ প্ৰায় ডেৰমাহ পূৰ্বৰে পৰা নিজ ৰাজ্য এৰি আহি অসমত বাহৰ পাতিছিলহি ছত্তিশগড়ৰ মুখ্যমন্ত্ৰী ভূপেশ বাঘেলে । ৰাষ্ট্ৰীয় ৰাজনীতিত 'গেম চেঞ্জাৰ' ৰূপে পৰিচিত এইগৰাকী কংগ্ৰেছী মুখ্যমন্ত্ৰী ।
ছত্তিশগড়ৰ ৰাজনীতি নিজৰ কুটনীতিৰে সলাই পেলাইছিল ভূপেশ বাঘেলে । সেইবাবেই হয়তো তেওঁ 'গেম চেঞ্জাৰ' । সেইজন 'গেম চেঞ্জাৰ' ৰ লগত আছে ৩৮০ জনীয়া এটা বৃহৎ দল । যিটো দলে ছত্তিশগড়ৰ মছনদত কংগ্ৰেছক বহুওৱাৰ সকলো ব্যৱস্থা কৰি দিছিল কুটনৈতিক কৌশেলেৰে । সেই ৩৮০ জনীয়া বিশেষ দলটোক লৈ ডেৰমাহজুৰি অসমত বাহৰ পাতি কংগ্ৰেছৰ সকলো নিৰ্বাচনী ৰণকৌশল প্ৰস্তুত কৰিছিল 'গেম চেঞ্জাৰ' ভূপেশ বাঘেলে ।
অসমত এইবাৰ বিজেপি মিত্ৰজোঁটক ওফৰাই কংগ্ৰেছৰ নেতৃত্বত চৰকাৰ পাতিবলৈ ভূপেশ বাঘেলৰ এই পৰিকল্পনাত ব্যয় কৰা হৈছিল দুশৰো অধিক কোটি টকা । ছত্তিশগড়ৰ মুখ্যমন্ত্ৰীগৰাকীক অসমৰ বাবে এই বিশেষ দায়িত্ব অৰ্পণ কৰিছিল কংগ্ৰেছ হাইকমাণ্ডে । যাৰ বাবে ৩৮০ জনীয়া বিশেষ কৰ্মবাহিনী লৈ ৰণক্ষেত্ৰত নামি পৰিছিল ভূপেশ বাঘেল । এইক্ষেত্ৰত বাঘেলৰ সোঁহাত স্বৰূপে কাম কৰিছিল নিখিল ভাৰত কংগ্ৰেছ কমিটিয়ে অসমৰ তত্বাৱধায়কৰূপে নিযুক্তি দিয়া ৰাজস্থানৰ জিতেন্দ্ৰ সিঙে । এতিয়া নিৰ্বাচন শেষ । বাঘেল আৰু জিতেন্দ্ৰ সিঙৰ মন্ত্ৰণাত চলিছে অসমত মহাজোঁটৰ চৰকাৰ গঠনৰ পৰিকল্পনা । এই পৰিকল্পনা কিমান সফল হয় সেয়া স্পষ্ট হ'ব ২ মে'ৰ পিছতহে ।
লগতে পঢ়ক: কলগাছিয়াত বহাগক আদৰণি অনুষ্ঠানৰ আয়োজন
