গুৱাহাটী, 4 মে' : যিসময়ত অসমলৈ দলে দলে দেশী-বিদেশী পৰ্যটকৰ আগমন ঘটে , সেই সময়খিনিতে এইবাৰ বৃহৎ লোকচানৰ সন্মুখীন হ'বলগীয়া হ'ল ৰাজ্যৰ পৰ্যটন বিভাগ । প্ৰথমে আৰম্ভ হ'ল "কা" বিৰোধী আন্দোলন । তাৰ পিছত চলিল ধাৰাবাহিক লক্ ডাউন । এই দুয়োটাই প্ৰায় তিনি হাজাৰ কোটি টকাৰ লোকচানৰ মুখলৈ লৈ গল অসমৰ পৰ্যটন উদ্যোগক । এতিয়া কিদৰে এই বৃহৎ ক্ষতিৰ কিছু অংশ হ'লেও কম কৰিব পাৰি তাৰেই ৰূপৰেখা প্ৰস্তুত কৰাত ৰাজ্যৰ পৰ্যটন বিভাগ ব্যস্ত হৈ পৰিছে ।
অসম পৰ্যটনে অনাগত দিনত সৰ্বাধিক গুৰুত্ব দিব ঘৰুৱা পৰ্যটনত ৷ ইটিভি ভাৰতক জনালে পৰ্যটন সঞ্চালক দেৱ কুমাৰ মিশ্ৰই ৷ অসমৰ বিভিন্ন পৰ্যটনস্থলীৰ প্ৰতি অসম-উত্তৰ পূৱৰ লোকক আকৰ্ষিত কৰিবলৈ ল'ব বিশেষ পদক্ষেপ ৷ ইতিমধ্যে বিভাগীয় বিষয়া-ট্যুৰ অপাৰেটৰৰ বৈঠকো সম্পন্ন হৈছে ৷ বিভাগীয় সঞ্চালক গৰাকীয়ে আৰু জনোৱা মতে বিদেশী পৰ্যটকৰ আশা এতিয়া অসমে অন্ততঃ কিছু দীঘলীয়া সময়ৰ বাবে বাদ দিব লাগিব ।
দেশী পৰ্যটকৰ ক্ষেত্ৰতো মহাৰাষ্ট্ৰ, দিল্লী, গুজৰাটৰ পৰাই অধিক পৰ্যটকৰ আগমন ঘটে অসমলৈ । কিন্তু ক'ৰণাই বাৰুকৈয়ে জোঁকাৰি গৈছে এই কেইখন ৰাজ্যক । তুলনামূলকভাৱে অসম বা উত্তৰ-পূৱেই এই সময়ত কিছু পৰিমাণে নিৰাপদ হৈ আছে । সেয়েহে ঘৰুৱা পৰ্যটনৰ ওপৰতে সৰ্বাধিক গুৰুত্ব দিবলৈ সাজু হৈছে পৰ্যটন বিভাগ ।
ঘৰুৱা পৰ্যটনে সামৰি ল'ব অসমৰ ঐতিহাসিক স্থান, কীৰ্তি চিহ্ন, ধৰ্মীয় স্থানসমূহ ৷ জ্যেষ্ঠ নাগৰিকৰ বাবে চৰকাৰৰ "পূণ্যধাম যাত্ৰা" ৰ গন্তব্য স্থান হ'ব পাৰে অসমৰে ঠাই ৷ কাশী, মথুৰা, বৃন্দাবনৰ সলনি গন্তব্য স্থান হ'ব পাৰে বৰদোৱা, মাজুলী, মধুপুৰ সত্ৰ, পৰশুৰাম কুণ্ড ৷ জাতিংগা, ৰংঘৰ, তলাতল ঘৰ, সেউজ চাহ বাগিচাও হব পাৰে লক্ষ্যস্থান ৷ অসমৰ সকলো পৰ্যটনথলী সামৰি পৰ্যটন বিভাগে আৰম্ভ কৰিব বিশেষ পেকেজ ৷
মুঠতে তিনি হাজাৰ কোটিৰ লোকচান সম্পূৰ্ণ পূৰাব নোৱাৰিলেও কিছু এটা অংশ এনেদৰে ঘৰুৱা পৰ্যটকৰ বাবে বিশেষ পেকেজ আৰম্ভ কৰিয়েই পূৰণ কৰাৰ চিন্তা চৰ্চা কৰিছে ৰাজ্যৰ পৰ্যটন বিভাগে । কিয়নো অসমৰ পৰ্যটন উদ্যোগটোৰ সৈতে প্ৰত্যক্ষ বা পৰোক্ষভাৱে জড়িত হৈ আছে প্ৰায় পাঁচ লাখ লোক । জড়িত হৈ আছে অসমৰ অৰ্থনীতিৰ এক বৃহৎ অংশও ।
লগতে পঢ়ক : লক্ ডাউনৰ মাজতে গাঁৱত চাংঘৰ সাজি কৃষ্টি চৰ্চা যোৰহাটৰ যুৱকৰ
