গুৱাহাটী, 8 নৱেম্বৰ : "আইন সকলোৰে বাবে সমান হোৱা উচিত ৷" এই মন্তব্য অসম তৃণমূল কংগ্ৰেছৰ সভাপতি তথা প্ৰাক্তন সাংসদ ৰিপুন বৰাৰ ৷ সাম্প্ৰদায়িক মন্তব্য কৰাৰ বাবে জলেশ্বৰৰ কংগ্ৰেছী বিধায়ক আফতাব উদ্দিন মোল্লাক গ্ৰেপ্তাৰ কৰা সন্দৰ্ভত এইদৰে প্ৰতিক্ৰিয়া ব্যক্ত কৰে ৰিপুন বৰাই ৷
বুধবাৰে সংবাদ মাধ্যমৰ আগত প্ৰতিক্ৰিয়া ব্যক্ত কৰি ৰিপুন বৰাই কয় যে উগ্ৰ সাম্প্ৰদায়িক মন্তব্য দিয়াৰ বাবে কংগ্ৰেছৰ বিধায়ক আফতাব উদ্দিন মোল্লাক আইনৰ আধাৰত আৰক্ষীয়ে গ্ৰেপ্তাৰ কৰিছে ৷ তাত আমাৰ ক'বলগীয়া একো নাই ৷ কিন্তু আইন মতে বিধায়ক মোল্লাক গ্ৰেপ্তাৰ কৰিছে যদিও আইন সকলোৰে বাবে সমান হ'ব লাগে ৷ আফতাব উদ্দিন মোল্লাক আৰক্ষীয়ে গ্ৰেপ্তাৰ কৰিছে ভাল কথা বুলি সদৰি কৰি তেওঁ কয় যে একে ধাৰাতে সাংসদ বদৰুদ্দিন আজমলকো গ্ৰেপ্তাৰ কৰিব লাগে আৰু মুখ্যমন্ত্ৰী হিমন্ত বিশ্ব শৰ্মাকো গ্ৰেপ্তাৰ কৰিব লাগে ৷ লগতে সাম্প্ৰদায়িক মন্তব্য কৰা বিজেপিৰ বহু নেতাকো গ্ৰেপ্তাৰ কৰিব লাগে বুলি তেওঁ কয় ৷
তেওঁ লগতে কয় যে মিঞাক শেষ কৰি দিম বুলি ঘৃণাৰ মন্তব্য কৰা মুখ্যমন্ত্ৰীক গ্ৰেপ্তাৰ কৰিব লাগে ৷ আজমলে বহু বাৰ সাম্প্ৰদায়িক মন্তব্য কৰি আহিছে বুলি তেওঁ কয় ৷ তেওঁ মন্ত্ৰী পীযুষ হাজৰীকাই কৰা সাম্প্ৰদায়িক মন্তব্যৰ প্ৰসংগও উল্লেখ কৰে ৷ যি মন্তব্যৰ বাবে বিধায়ক অফতাব উদ্দিন মোল্লাক গ্ৰেপ্তাৰ কৰা হৈছে সেই ধৰণে অনুৰূপ সাম্প্ৰদায়িক মন্তব্য কৰাৰ বাবে আজমল আৰু মুখ্যমন্ত্ৰীকে ধৰি পীযুষ হাজৰীকাক গ্ৰেপ্তাৰ কৰিব লাগে বুলি তেওঁ কয় ৷
আজমলক গ্ৰেপ্তাৰ নকৰা সন্দৰ্ভত তেওঁ কয় যে মুখ্যমন্ত্ৰীৰে আজমলৰ গোপন বুজাবুজি আছে ৷ আইন, আৰক্ষী-প্ৰশাসন বিজেপি চৰকাৰৰ হাতত আছে বাবেই তেওঁলোকে নিজৰ খেয়াল-খুছি মতে কাম কৰিছে বুলি অভিযোগ কৰি তেওঁ কয় যে মুখ্যমন্ত্ৰীয়ে যি মন যায় তাকেই কয় ৷ আৰক্ষীয়ে কেৱল শাসক পক্ষৰ হৈ একপক্ষীয়ভাৱে কাম কৰি আছে বুলি সদৰী কৰি তেওঁ কয় যে এইটো দেশৰ বাবে ডাঙৰ বিপদজনক ঘটনা ৷ বৰ্তমান সময়ত আইন কেৱল শাসক পক্ষৰ বাবেহে আছে বুলি তেওঁ কয় ৷
উল্লেখ্য যে উগ্ৰ সাম্প্ৰদায়িক মন্তব্য কৰাৰ বাবে মঙলবাৰে নিশা দিছপুৰ আৰক্ষীয়ে বিধায়ক আৱাসৰ পৰা বিধায়ক আফতাব উদ্দিন মোল্লাক গ্ৰেপ্তাৰ কৰিছিল ৷ বিধায়ক আৱাসৰ এফ ব্লকত থকা দক্ষিণ শালমাৰাৰ কংগ্ৰেছী বিধায়ক ৱাজেদ আলী চৌধুৰীৰ বিধায়ক আবাসৰ পৰা আৰক্ষীয়ে গ্ৰেপ্তাৰ কৰিছিল আফতাব উদ্দিন মোল্লাক ৷ নামঘৰীয়া আৰু মন্দিৰৰ পূজাৰী সন্দৰ্ভত অতি বিতৰ্কিত মন্তব্য কৰিছিল জলেশ্বৰ সমষ্টিৰ বিধায়কগৰাকীয়ে ৷ নামঘৰীয়া আৰু পূজাৰীক ধৰ্ষণকাৰী বুলি কৰা মন্তব্যৰ পাছতেই সমগ্ৰ ৰাজ্যজুৰি সৃষ্টি হৈছিল প্ৰতিক্ৰিয়াৰ ৷
ৰাজ্যৰ বিভিন্ন থানাত বিভিন্ন দল-সংগঠন তথা ব্যক্তি বিশেষে বিধায়কজনৰ বিৰুদ্ধে দাখিল কৰিছিল এজাহাৰ ৷ দিছপুৰ থানাতো বিধায়কজনৰ বিৰুদ্ধে ভেটাপাৰাৰ দীপক কুমাৰ দাস নামৰ এজন লোকে দাখিল কৰিছিল এখন এজাহাৰ ৷ এই এজাহাৰৰ ভিত্তিতে বিধায়ক আফতাব উদ্দিন মোল্লাৰ বিৰুদ্ধে U/S 295A / 153A(1)(b)/505(2) ধাৰা সন্নিৱিষ্ট কৰি 2127/23 নম্বৰ গোচৰ ৰুজু কৰি গ্ৰেপ্তাৰ কৰিছিল দিছপুৰ আৰক্ষীয়ে ৷ ইফালে কংগ্ৰেছ দলৰ তৰফৰ পৰা বিধায়কজনলৈ কাৰণ দৰ্শোৱাৰ জাননী জাৰি কৰা হৈছে ৷
লগতে পঢ়ক : AAP leader criticizes Sherman Ali : শ্বেৰমান আলীক মুকলি প্ৰত্যাহ্বান আপ নেতাৰ; কিন্তু কিয়?
