গুৱাহাটী,26 আগষ্ট: কেন্দ্ৰীয় আঁচনি ৰূপায়নৰ ক্ষেত্ৰত অসমে দেখুওৱা লেহেমীয়া গতিত উদ্বিগ্ন হৈ পৰিছে ভাৰত চৰকাৰৰ ড'নাৰ মন্ত্ৰণালয় ৷ আনকি বছৰৰ পিছত বছৰ উকলি যোৱাৰ পিছতো উত্তৰ পূৱ পৰিষদে অনুমোদন জনোৱা অসমৰ বহুকেইখন আঁচনি আজিও সম্পূৰ্ণ হৈ নুঠিল ৷ প্ৰাপ্ত তথ্য মতে 2020 বৰ্ষলৈকে সমগ্ৰ অসমত উত্তৰ পূৱ পৰিষদৰ অধীনত সৰ্বমুঠ 66 টা প্ৰকল্পৰ কাম চলি আছে ৷ মন কৰিবলগীয়া যে, উত্তৰ পূৱ পৰিষদৰ দ্বাৰা 2004,2005 চনতে অনুমোদিত আঁচনি আজিও অসম্পূৰ্ণ হৈ আছে ৷
অসমত এইদৰে প্ৰকল্প সমূহৰ কাম আধৰুৱা হৈ পৰি ৰোৱা ঘটনাত উদ্বিগ্ন হৈ পৰিছে নৱনিযুক্ত ড'নাৰ মন্ত্ৰী জি কিষাণ ৰেড্ডী ৷ এইদৰে অধিকাংশ প্ৰকল্পই আধৰুৱা হৈ পৰি ৰোৱাৰ বাবে প্ৰকল্প সমূহৰ পৰবৰ্তী কিস্তিৰ ধন কেন্দ্ৰৰ পৰা লাভ কৰাৰ ক্ষেত্ৰতো বাধাৰ সৃষ্টি হৈছে ৷ 2021 বৰ্ষতো অসমত 25 টা প্ৰকল্পৰ অনুমোদন জনোৱাত অসমত আজিৰ তাৰিখত চলি থকা প্ৰকল্পৰ সংখ্যা হৈছেগৈ 91 টা ৷
প্ৰাপ্ত তথ্য অনুসৰি বহুকেইটা প্ৰকল্পৰ বাবে ধন মোকলাই দিয়াৰ পিছতো সেই ধনৰ ব্যৱহাৰিক প্ৰমাণপত্ৰ উত্তৰ পূৱ পৰিষদে দাখিল নকৰাৰ বাবেই কেন্দ্ৰীয় চৰকাৰে পৰবৰ্তী ধন মোকলাই দিব পৰা নাই ৷ আনহাতে সুদীৰ্ঘ সময়জুৰি চলি থকা প্ৰকল্প সমূহ সম্পূৰ্ণ হৈ নুঠা ঘটনায়ো বিমোৰত পেলাইছে ড'নাৰ মন্ত্ৰনালয়ক ৷
বৰাক নদীৰ ওপৰত এখন দলং নিৰ্মাণৰ বাবে 2005 চনতে 19.27 কোটি টকাৰ অনুমোদন দিয়া হৈছিল ৷ কিন্তু দলং খন আজিও হৈ নুঠিল ৷ একেদৰে আন এক প্ৰকল্পত 2004 চনতে উত্তৰ পূৱ পৰিষদে শিলচৰ- দোৱাৰবন্দ-গাগলেচাৰা পথ নিৰ্মাণৰ বাবে 85.82 কোটি টকা অনুমোদন জনাইছিল আৰু ইয়াৰে 77.53 কোটি টকা মোকলাইয়ো দিয়া হৈছিল ৷ সেই পথ আজিকোপতি সম্পূৰ্ণ হৈ নুঠিল ৷
অসমত চলি থকা এনেবিলাক কাণ্ড কাৰখানাই হতভম্ব কৰি তুলিছে নৱনিযুক্ত ড'নাৰ মন্ত্ৰী কিষাণ ৰেড্ডীক ৷ যাৰ বাবে তেওঁ অনুসন্ধানৰ বাবে শীঘ্ৰে এটা বিভাগীয় দল অসমলৈ পঠিয়াবলৈ সাজু হৈছে বুলিও জানিব পৰা গৈছে ৷
লগতে পঢ়কঃ ৰাজ্যিক কেবিনেটত নিবনুৱাৰ বাবে ভাল খবৰ: অচিৰেই মুকলি হ'ব বহু পদ
