গুৱাহাটী,১ অক্টোবৰ : উপ-নিৰ্বাচনত বিৰোধী ঐক্যৰ কথা কোৱা কংগ্ৰেছ দলে এককভাৱে প্ৰতিদ্বন্দ্বিতা কৰাটো নিশ্চিত। ইতিমধ্যে পাঁচটা সমষ্টিৰ নিৰ্বাচনৰ দিন ঘোষণা কৰা হৈছে যদিও ছটা সমষ্টিত উপ-নিৰ্বাচন অনুষ্ঠিত হ'ব । যাৰবাবে সম্পূৰ্ণ ৰূপে সাজু হৈছে প্ৰধান বিৰোধী দল কংগ্ৰেছ । উপ-নিৰ্বাচনৰ সন্দৰ্ভত শুকুৰবাৰে গুৱাহাটীৰ এখন হোটেলত প্ৰদেশ কংগ্ৰেছৰ কেইবালানি বৈঠক অনুষ্ঠিত হয় । প্ৰদেশ কংগ্ৰেছৰ সভাপতি ভূপেন বৰাৰ আহ্বান ক্ৰমে আয়োজন কৰা বৈঠকত নিখিল ভাৰত কংগ্ৰেছ কমিটীৰ প্ৰতিনিধিয়ে অংশ গ্ৰহণ কৰে ।
লগতে পঢ়ক: শ্বেৰমান আলি বিজেপিৰ এজেন্ট : অখিল গগৈ
প্ৰথমতে শিৱসাগৰ, যোৰহাট, মাজুলী, বাক্সা, কোকৰাঝাৰ আৰু বৰপেটাৰ জিলাৰ কংগ্ৰেছৰ জিলা সভাপতিৰ লগতে উপ-নিৰ্বাচন অনুষ্ঠিত হ'বলগীয়া ছটা সমষ্টি ক্ৰমে থাওৰা, মৰিয়নী, তামুলপুৰ, গোঁসাইগাঁও, ভৱানীপুৰ আৰু মাজুলীৰ ব্লক কংগ্ৰেছৰ সভাপতিসকলৰ লগত বৈঠক অনুষ্ঠিত হয় ।
ইয়াৰ পাচতে, প্ৰদেশ কংগ্ৰেছৰ বৈঠক অনুষ্ঠিত হয় । বৈঠকৰ অন্তত সংবাদ মাধ্যমৰ আগত প্ৰদেশ কংগ্ৰেছৰ সভাপতি ভূপেন বৰাই কয়, টিকটৰ বাবে আবেদন জনোৱা প্ৰাৰ্থীৰ তালিকা বিচাৰ-বিবেচনা কৰি সংক্ষিপ্ত কৰা হৈছে । ছটা সমষ্টিৰ বাবে মুঠ ৪৮ গৰাকী প্ৰাৰ্থীয়ে আবেদন কৰিছিল আৰু ইয়াৰে প্ৰতিটো সমষ্টিত তিনিগৰাকীকৈ ১৮ গৰাকী প্ৰাৰ্থীৰ নাম সন্নিবিষ্ট কৰি তালিকা প্ৰস্তুত কৰা হৈছে ।
লগতে পঢ়ক: মাজুলীৰ আয়ুৰ্বেদিক হাস্পতালৰ নিৰ্মাণ কাৰ্য পৰিদৰ্শন স্বাস্থ্যমন্ত্ৰীৰ
উপ-নিৰ্বাচন অনুষ্ঠিত হ'বলগীয়া জিলাসমূহৰ জিলা কংগ্ৰেছ কমিটিয়ে এটা সমষ্টিত তিনি গৰাকীকৈ প্ৰাৰ্থীৰ পেনেল প্ৰস্তুত কৰিছে । ইয়াৰ পাছত প্ৰদেশ কংগ্ৰেছৰ নিৰ্বাচন কমিটিৰ বৈঠকত সিদ্ধান্ত কৰি প্ৰাৰ্থী তালিকা দিল্লীৰ হাইকামাণ্ডলৈ প্ৰেৰণ কৰা হ'ব । হাই কামাণ্ডে চূড়ান্ত তালিকাত ছীল-মোহৰ লগাব ।
উল্লেখ যে, বিজেপিক প্ৰতিহত কৰাৰ বাবে বিৰোধী প্ৰতিটো দলেই উপ-নিৰ্বাচনত বিৰোধীৰ একোজন উমৈহতীয়া প্ৰাৰ্থী দিয়াৰ পোষকতা কৰিছিল । এই ক্ষেত্রত বিৰোধী দলসমূহৰ মাজত আলোচনাও অনুষ্ঠিত হৈছিল । কিন্তু বিৰোধী ঐক্যৰ বিপৰীতে ছটা সমষ্টিতে নিজৰ প্ৰাৰ্থী দিয়াৰ বাবে প্ৰাৰ্থী তালিকা প্ৰায় চূড়ান্ত কৰিছে কংগ্ৰেছে ।
লগতে পঢ়ক: নতুন SOP আহিল : ছবি গৃহ মুকলি কৰাৰ অনুমতি ৰাজ্য চৰকাৰৰ
