গুৱাহাটী, 13 মে': গুৱাহাটী তথা ৰাজ্যত শীঘ্ৰেই ৰাজপথত বিশেষকৈ ৰাষ্ট্ৰীয় ঘাইপথ পথত গাড়ীৰ গতিবেগ নিয়ন্ত্ৰণৰ বাবে কঠোৰ ব্যৱস্থা গ্ৰহণ কৰিব ৰাজ্য চৰকাৰে ৷ শুকুৰবাৰে এই কথা ঘোষণা কৰিলে মুখ্যমন্ত্ৰী ড৹ হিমন্ত বিশ্ব শৰ্মাই (Assam Government strict to control vehicle speed) ।
উল্লেখ্য যে, গুৱাহাটীৰ ফাঁচীবজাৰত শুকুৰবাৰে অনুষ্ঠিত এক অনুষ্ঠানত অংশ গ্ৰহণ কৰি মুখ্যমন্ত্ৰীগৰকীয়ে কয় যে, গুৱাহাটী তথা ৰাজ্যত দুৰ্ঘটনা হ্ৰাস কৰাৰ বাবে চৰকাৰে এই পদক্ষেপ গ্ৰহণ কৰাৰ সিদ্ধান্ত লৈছে ।
ৰাজপথত তীব্ৰবেগী বাহনৰ ক্ষেত্ৰত ব্যৱস্থা গ্ৰহণ কৰাৰ লগতে ৰাজপথত বাহনৰ গতিবেগ নিয়ন্ত্ৰণৰ বাবে ১২ খন অত্যাধুনিক বাহন মুকলি কৰিব চৰকাৰে ৷ (12 vehicles are open for speed testing)।
তেওঁ কয় যে, ৰাজপথত গাড়ীৰ গতিবেগ কিমান হ'ব লাগিব সেই সন্দৰ্ভত শীঘ্ৰেই আলোচনা কৰি সিদ্ধান্ত গ্ৰহণ কৰা হ'ব । মুখ্যমন্ত্ৰীগৰাকীয়ে কয় যে, গুৱাহাটীত এবছৰত দুচকীয়া বাহনত চালক আৰু আৰোহীয়ে হেলমেট পিন্ধাটো বাধ্যতামূলক কৰাৰ পিছত গুৱাহাটীত দুৰ্ঘটনাত নিহত তথা আহতৰ সংখ্যা ৫০ শতাংশ হ্ৰাস পাইছে । দুৰ্ঘটনাৰ পৰিমাণ এবছৰত ২১ শতাংশ হ'লেও হ্ৰাস পাইছে ।
তেওঁ কয় যে, চৰকাৰে দুচকীয়া বাহনত চালক আৰু আৰোহীয়ে হেলমেট পিন্ধাটো বাধ্যতামূলক কৰাৰ ক্ষেত্ৰত কঠোৰ স্থিতি গ্ৰহণ কৰাৰ বাবে এয়া সম্ভৱপৰ হৈছে । সেয়ে ৰাজপথত বাহনৰ গতিবেগ নিয়ন্ত্ৰণৰ বাবে চৰকাৰ এইবাৰ কঠোৰ হ'ব । এই ক্ষেত্ৰত কোনো আপোচ কৰা নহয় ।
মুখ্যমন্ত্ৰীগৰাকীয়ে কয় যে, পৰিবহন বিভাগত প্ৰায় সকলো ধৰণৰ কাম এতিয়াৰে পৰা অনলাইন কৰা হ'ব । যাতে মানুহে সময় নষ্ট কৰি দালালৰ কবলত পৰি কামৰ বাবে পৰিবহণ বিভাগৰ কাৰ্যালয়লৈ আহিব নালাগে ।
ইতিমধ্যে, চালকৰ learner licenceৰ বাবে অনলাইন ব্যৱস্থা কৰা হৈছে । বিগত এবছৰত ৭ লাখ মানুহে অনলাইন ব্যৱস্থাৰে learner license লাভ কৰিছে । 2021 বৰ্ষত পৰিবহন বিভাগে সৰ্বাধিক ৰাজহ সংগ্ৰহ কৰিবলৈ সক্ষম হৈছে ।
আনহাতে, অনাগত দিনত গুৱাহাটীৰ খানাপাৰাৰ পৰা বৰঝাৰলৈ ৰ'পৱে নিৰ্মাণ কৰা হ'ব । মাজে মাজে যাত্ৰীৰ বাবে ষ্ট'পেজৰ ব্যৱস্থাও কৰা হ'ব । গুৱাহাটীৰ যান-জঁট নিয়ন্ত্ৰণৰ বাবে এই ব্যৱস্থা গ্ৰহণ কৰা হ'ব বুলি আনুষ্ঠানিকভাৱে সদৰী কৰে মুখ্যমন্ত্ৰী ড৹ হিমন্ত বিশ্ব শৰ্মাই ।
লগতে পঢ়ক : No Helmet No Fuel campaign: হেলমেট পৰিধান নকৰিলে পেট্ৰল ডিপোত নাপাব তেল
