খানাপাৰা, 24 ফেব্ৰুৱাৰীঃ অসমৰ ৯১৫খন ধৰ্মানুষ্ঠানৰ আধ্যাত্মিক মুৰব্বীসকলৰ উপস্থিতিত আজি খানাপাৰাত 'অসম দৰ্শন আচঁনি'ৰ শুভ উন্মোচন কৰা হয় ৷ এই উন্মোচনী অনুষ্ঠানত মুখ্যমন্ত্ৰী সৰ্বানন্দ সোণোৱাল, মন্ত্ৰী হিমন্ত বিশ্ব শৰ্মা, মন্ত্ৰী কেশৱ মহন্তৰ লগতে অসম চৰকাৰৰ কেইবাগৰাকীও মন্ত্ৰী, বিধায়ক উপস্থিত থাকে ৷ সভাখনত উপস্থিত থাকি অসম দৰ্শন আঁচনিৰ বিভিন্ন কাৰ্যসূচীৰ বিষয়ে ভাষণ আগবঢ়াই অসম চৰকাৰৰ মন্ত্ৰী পৰিষদে ৷
এই আঁচনি সন্দৰ্ভত মন্ত্ৰী কেশৱ মহন্তই কয়, যোৱাবাৰ বাজেটত বিত্তমন্ত্ৰীৰ দ্বাৰা এই অসম দৰ্শন আঁচনিৰ বিষয়ে বিতংকৈ লিপিবদ্ধ কৰা হৈছিল ৷ তাত কিছুমান উল্লেখযোগ্য দিশ সাঙুৰি লোৱা হৈছিল ৷ আধ্যাত্মিক স্থানসমূহত সাধাৰণ প্ৰয়োজনখিনি পুৰণৰ বাবে 10 লাখকৈ টকা নিৰ্ধাৰণ কৰা হৈছে ৷ লগতে সেই আধ্যত্মিক অনুষ্ঠানসমূহলৈ যোৱা বাট পথৰ কামো আৰম্ভ কৰিছে ৷ ঐতিহ্য সংৰক্ষণৰ বাবে এখন আইন গৃহীত কৰা হ'ব আহিবলগীয়া বিধানসভা অধিৱেশনত ৷ অসম দৰ্শন আঁচনিয়ে অসমৰ পুনৰ নিৰ্মাণত বলিষ্ঠ ভূমিকা গ্ৰহণ কৰিছে বুলি মত প্ৰকাশ কৰে কেশৱ মহন্তই ৷
সভাখনত উপস্থিত থাকি মন্ত্ৰী হিমন্ত বিশ্ব শৰ্মাই কয় যে, আৱেগৰ দ্বাৰা পৰিচালিত নহৈ জাতিৰ সম্পদসমূহক ৰাইজৰ মাজলৈ উলিয়াই আনি বিশ্ব দৰবাৰত প্ৰতিষ্ঠা কৰা ৷ ৰাস্তাৰ আন্দোলনক জাতীয়তাবাদ বুলি কোৱা লোকৰ তেওঁ বিৰোধিতা কৰি কয়, যদি বটদ্ৰৱা সত্ৰক আমি বিশ্বৰ বুকুত পৰিচয় কৰি দিব পাৰো, তাতকৈ আৰু সুস্থ জাতীয়তাবাদ একোৱেই হ'ব নোৱাৰে ৷ অসমৰ প্ৰত্যেকটো মঠ, মন্দিৰ, নামঘৰলৈ 25 লাখ টকাকৈ আগবঢ়াব অসম চৰকাৰে ৷ লগতে অসমৰ ধৰ্মানুষ্ঠানসমূহলৈ যোৱা সকলো বাট পথ সুগম কৰি তোলা হ'ব ৷
এই অনুষ্ঠানত উপস্থিত থাকি মুখ্যমন্ত্ৰী সৰ্বানন্দ সোণোৱালেও তেওঁৰ ভাষণৰ জৰিয়তে বিভিন্ন বিষয়ত আলোকপাত কৰে ৷ তেওঁ কয় যে, এই অনুষ্ঠানটোৰ জৰিয়তে অসমৰ প্ৰতিখন জিলাতে বসবাস কৰা লোকসকলে মিলিত প্ৰচেষ্টাৰে সমন্বয়ৰ দ্বাৰা অসমখনক ভাৰতবৰ্ষৰ বুকুত শক্তিশালী ৰাজ্য হিচাপে গঢ় দি তুলিব ৷ বিজ্ঞান আৰু প্ৰযুক্তি বিদ্যাৰ এই পৃথিৱীখনত বিশ্ব জয় কৰিব হ'লে উঠি অহা প্ৰজন্মক একো গৰাকী বীৰ লাচিত বা বীৰ চিলাৰায় হিচাপে গঢ় দিব লাগিব ৷ এইখন চৰকাৰে অসমৰ খিলঞ্জীয়া ভূমি পুত্ৰৰ বাবে অস্তিত্ব ৰক্ষাৰ যাত্ৰাত দৃঢ়তাৰে পদক্ষেপ গ্ৰহণ কৰি আহিছে আৰু পদক্ষেপ গ্ৰহণ কৰি যাব ৷ বিজেপিৰ কাৰ্যকালত এনে কোনো সিদ্ধান্ত গ্ৰহণ কৰা হোৱা নাই, যি কাৰ্যই অসমৰ ভূমিপুত্ৰসকলৰ মনত বেদনা দিব পাৰে ৷
লগতে পঢ়কঃ ইটিভিত সম্প্ৰচাৰিত বাতৰিৰ পিছতেই গা লৰিল জল সম্পদ বিভাগৰ
