গুৱাহাটী, ১৭ মে': কৰ’ণাৰ বিভীষিকাৰ মাজতে আহি আছে বাৰিষাৰ আন এক আতংক বানপানী । এনে অৱস্থাত এতিয়াও ৰাজ্যৰ বিভিন্ন অঞ্চলত বহু ভঙা মথাউৰিৰ মেৰামতি সম্পূৰ্ণ হৈ উঠা নাই । মুখ্যমন্ত্ৰী ড৹ হিমন্তবিশ্ব শৰ্মাই সোমবাৰে জনতা ভৱনত এই সম্পৰ্কে এক পৰ্যালোচনা বৈঠকত ভাগ লয় । নৱনিযুক্ত জলসম্পদ মন্ত্ৰী পীযুষ হাজৰিকা সমন্বিতে বিভাগটোৰ শীৰ্ষ বিষয়াসকলৰ পৰা কামৰ অগ্ৰগতিৰ বুজ লয় মুখ্যমন্ত্ৰীগৰাকীয়ে ।
বৈঠকত মুখ্যমন্ত্ৰীয়ে নিৰ্দেশ দিয়ে যাতে চলিত মে' মাহৰ ভিতৰতে ৰাজ্যত এতিয়াও মেৰামতি বিহীন বাবে পৰি থকা সকলো মথাউৰিৰ মেৰামতিৰ কাম সম্পূৰ্ণ কৰা হয় । আনহাতে প্ৰতি বছৰে ৰাজ্যৰ যিকেইখন নদীয়ে অধিক তাণ্ডৱৰ সৃষ্টি কৰে সেই নদীসমূহ চিনাক্ত কৰি বান প্ৰতিৰোধী এক সুকীয়া ব্যৱস্থা হাতত লোৱাৰ বাবেও বিভাগীয় মন্ত্ৰী আৰু আমোলা বিষয়া সকলক নিৰ্দেশ দিয়ে ।
আনহাতে বানপানী ৰোধৰ নামত কিম্বা মথাউৰি মেৰামতিৰ নামত কোনো কাৰণতে যাতে ৰাজহুৱা ধনৰ অপচয় হ’ব নোৱাৰে তাৰ বাবে জবাবদিহি কৰিব পৰা এক ব্যৱস্থা আৰম্ভ কৰিবলৈও নিৰ্দেশ দিয়ে মুখ্যমন্ত্ৰীগৰাকীয়ে ।
