গুৱাহাটী, 28 নৱেম্বৰ : সঘন বিদ্যুৎ মাচুল বৃদ্ধিৰে ৰাজ্যবাসীক মাধমাৰ শোধাই অহা এ পি ডিচি এলে বিদ্যুৎ চুৰ কৰা পুঁজিপতিৰ উদ্যোগক কোটি টকাৰ মাচুল ৰেহাই দিয়া বুলি অভিযোগ কৰিছে আপ অসমে (AAP Assam)৷ এই সম্পৰ্কত সোমবাৰে আপ অসমৰ গণেশগুৰিস্থিত মুখ্য কাৰ্যালয়ত আয়োজন কৰা হয় এখন সংবাদমেল ৷
সংবাদমেলত আপ অসমৰ ৰাজ্যিক যুটীয়া সমন্বয়ক জিতুল ডেকাই অভিযোগ কৰি কয় যে লোকচানৰ দোহাই দি সঘনাই বিদ্যুৎ মাচুল বৃদ্ধি কৰা এ পি ডি চি এলে পুঁজিপতি গোষ্ঠীৰ উদ্যোগ এটাক ২১ কোটি টকা বিদ্যুৎ মাচুল ৰেহাই দিছে (APDCL Tariff Exemption)। বিদ্যুৎ চুৰি কৰাৰ বাবে এই উদ্যোগটোক ২৫.৪৩ কোটি টকাৰ বিল দিছিল এ পি ডি চি এলে । কিন্তু ৰহস্যজনকভাৱে APDCL Empowered committee এ উক্ত উদ্যোগটোক ২১ কোটি টকা ৰেহাই দি মাত্ৰ ৪.৩৩ কোটি টকা মাচুল আদায় দিয়াৰ নিৰ্দেশ দিছিল ।
যোৱা জুলাইত এ পি ডি চি এলে এই বৃহৎ কেলেংকাৰি সংঘটিত কৰিছে বুলি তেওঁ অভিযোগ কৰে । বৰাক ইস্পাত প্ৰাইভেট লিমিটেড(Barak Ispat PVT LTD) নামৰ উদ্যোগটোক ৰেহাই দিছে ২১ কোটি টকা । যি সময়ত সাধাৰণ গ্ৰাহকে ৫০০/৬০০ টকা বিল নিদিলেই বিদ্যুৎ কর্তন কৰে, সেই সময়ত এ পি ডি চি এলে বৰাক ইস্পাত প্ৰাইভেট লিমিটেডক এক-দুই কোটি নহয়, ২১ কোটি টকাৰ মাচুল ৰেহাই দিয়াৰ আঁৰত বৃহৎ কেলেংকাৰি আছে বুলি আপৰ নেতাগৰাকীয়ে উল্লেখ কৰে ।
জিতুল ডেকাই কয় যে পুঁজিপতি উদ্যোগ গোষ্ঠীক মাছুল ৰেহাই দি এ পি ডি চি এলে সাধাৰণ লোকৰ ওপৰত বৰ্ধিত মাচুল আৰোপ কৰাৰ কোনো অধিকাৰ নাই । এপি ডি চি এলৰ empowered committee ৰ নিৰ্দেশ অনুসৰি বৰাক ইস্পাতৰ আবেদন বিবেচনা কৰি প্ৰতিষ্ঠান টোক ২৫.৪৩ কোটি টকাৰ পৰিবৰ্তে মাত্ৰ ৪.৩৩ কোটি টকা আদায় দিবলৈ কৈছিল । লগতে ভৱিষ্যতে বিদ্যুৎ চুৰি নকৰিবলৈ সকিয়াই দিছে৷
কিন্তু এয়া কিদৰে সম্ভৱ হ’ল ? সততে লোকচানত চলি থকাৰ অজুহাত দেখুৱাই সঘনাই বিদ্যুৎ মাচল বৃদ্ধি কৰা এ পি ডি চি এলে বৰাক ইস্পাতক কিদৰে মাচুল ৰেহাই দিয়াৰ সিদ্ধান্ত দিলে ? এয়া অপৰাধ, দুর্নীতি, ভ্ৰষ্টাচাৰ নহয় জানো বুলি প্ৰশ্ন কৰি আপন নেতাগাকীয়ে কয় যে, ৰাজহ বৃদ্ধিত গুৰুত্ব দিয়া এ পি ডি চি এলে বৰাক ইস্পাতক ২১ কোটি টকাৰ মাচুল ৰেহাই দিয়াৰ কাৰণ ৰাজহুৱা কৰিব লাগিব ।
যোৱা আগষ্ট মাহত ৰাজ্যৰ সাধাৰণ বিদ্যুৎ গ্ৰাহকৰ পৰা দুগুণ, তিনিগুণতকৈ অধিক বিদ্যুৎ মাচুল সংগ্ৰহ কৰি ব্যাপক লুণ্ঠন চলাইছিল এ পি ডি চি এলে । সেই সময়ত ৰাজ্যজুৰি ইয়াৰ প্ৰতিবাদ হৈছিল । ফলত মুখ্যমন্ত্ৰীয়ে এয়া স্মার্ট মিটাৰৰ বিসংগতিৰ বাবে হোৱা বুলি টুইট কৰিছিল (Smart electric meter in Assam)।
ইয়াৰ বিপৰীতে এ পি ডি চি এলে স্মার্ট মিটাৰৰ বাবে বিদ্যুৎ মাচুল বৃদ্ধি নহয় বুলি পৰস্পৰ বিৰোধী মন্তব্য দিছিল । আনহাতে বিভাগীয় মন্ত্ৰী নন্দিতা গার্লচাই এই সন্দৰ্ভত অজ্ঞতা প্ৰকাশ কৰি তদন্তৰ বাবে সমিতি বনোৱাৰ কথা ঘোষণা কৰিছিল । মন্ত্ৰী পীযুষ হাজৰিকাই আকৌ কৰ্মচাৰীৰ মাহে মাহে দৰমহা বৃদ্ধি হোৱাৰ বাবে বিদ্যুৎ মাচুল বৃদ্ধি হৈছে বুলি অতি তৰল মন্তব্য আগবঢ়াইছিল ।
এ পি ডি চি এলে অতিৰিক্তভাৱে আদায় লোৱা মাচুলল পৰৱৰ্তী সময়ত মিলাই দিয়া হ’ব বুলি মোবাইল নম্বৰ ৰাজহুৱা কৰিছিল৷
কিন্তু ৰাজ্যৰ জনসাধাৰণে ইয়াৰ দ্বাৰা কোনো সমাধান নাপালে৷ অতিৰিক্ত মাচুল কিদৰে মিলাব সেয়া আজিলৈকে ৰাজহুৱা নহ'ল ৷ এই সন্দৰ্ভত জিতুল ডেকাই বিভাগীয় নিৰ্দেশনাৰ তথ্য দাঙি ধৰি কয় যে- যোৱা 1 ছেপ্টেম্বৰত Chief General Maneger ( Com&EE ) এ পত্ৰযোগে এ পি ডি চি এলৰ সমূহ ইলেকট্ৰিকেল চাৰ্কুলাৰত আগষ্ট মাহত বিল সংগ্ৰহ সন্তোষজনক নহয় বুলি কোৱাৰ লগতে ক্ষতিপূৰণৰ বাবে ব্যৱস্থা লবলৈ নিৰ্দেশ দিয়ে ।
পৰৱৰ্তী সময়ত ৰাজ্যৰ গ্ৰাহকৰ পৰা ছেপ্টেম্বৰ মাহত অত্যাধিকভাবে মাচুল আদায় লোৱা হয়৷ এই সন্দৰ্ভত ৰাজ্যজুৰি প্ৰতিবাদ হয় (APDCL bill hike)। যাৰ ফলত বিদ্যুৎ মাচুল বৃদ্ধিৰ বিষয়টো তদন্ত কৰি ২৬ ছেপ্টেম্বৰৰ ভিতৰত প্ৰতিবেদন দিবলৈ এ পি ডি চি এলৰ পৰিচালন সঞ্চালকে ইং ২০/৯/২০২২ তাৰিখে এখন বিভাগীয় জাননী প্ৰকাশ কৰে । কিন্তু আজিলৈ এই তদন্তত কি ওলাল কোনেও নাজানে ।
আপৰ যুটীয়া সমন্বয়ক জিতুল ডেকাই আন এক তথ্য দাঙি দেখুৱাই কয় যে কি দৰে আগষ্ট মাহত মুঠ ৫৭১৫৭ ইউনিট বিল অহা হোজাই চাৰ্কোলত ছেপ্টেম্বৰ মাহত মুঠ ৮২২১৬১ ইউনিট বিল হৈছিল । অর্থাৎ ছেপ্টেম্বৰ মাহত অত্যাধিকভাৱে হোজাই চাৰ্কোলত ৭৬৫০০৪ ইউনিট বিল বৃদ্ধি হৈছিল ।
তেনেদৰে চামগুৰি, লংকা, কোকৰাঝাৰ, বৰপেটা, মঙলদৈ আদি চাৰ্কোলত ছেপ্টেম্বৰ মাহত অত্যাধিকভাৱে বৃদ্ধি হোৱা ইউনিটৰ তথ্য জিতুল ডেকাই ৰাজহুৱা কৰে । এই অস্বাভাৱিক বিদ্যুৎ মাচুল বৃদ্ধি বৰাক ইস্পাতৰ দৰে উদ্যোগক মাচুল ৰেহাই দিয়াৰ কাৰণ হ'ব পাৰে বুলি আপ অসমে সন্দেহ প্ৰকাশ কৰিছে৷
বৃহৎ উদ্যোগ গোষ্ঠীক কোটি টকাৰ বিদ্যুৎ মাছুল ৰেহাই দি সেই ক্ষতি সাধাৰণ ৰাইজৰ মূৰত জাপি দিছে । জিতুল ডেকাই এই সমগ্ৰ ঘটনাৰ চি বি আই তদন্ত দাবী কৰে৷ সংবাদমেলত আপৰ যুটীয়া সমন্বয়ক লক্ষ্মীকান্ত ডুবে আৰু যুটীয়া সম্পাদক অম্লান হাতী বৰুৱাও উপস্থিত আছিল ।
লগতে পঢ়ক : Primary schools in Assam: ৮ মাহত দুকুৰি দিনো পাঠদান হোৱা নাই প্ৰাথমিক বিদ্যালয়সমূহত
