গুৱাহাটী, 8 ডিচেম্বৰঃ ৰাজ্যত কেব বিৰোধী বতাহ বলি থকাৰ মাজতে কৃষক মুক্তি সংগ্ৰাম সমিতিৰ নেতা অখিল গগৈয়ে দেওবাৰে এক সংবাদমেলৰ আয়োজন কৰে ৷ সংবাদমেলখনত কেব সম্পৰ্কে আলোচনা কৰা হয় ৷ কৃষক মুক্তিৰ নেতাগৰাকীয়ে কেব সম্পৰ্কত কয় যে, বিলখনত ধৰ্মীয় উৎপীড়ন বুলি কোনো শব্দ নাই ৷ বিপৰীতে বিশেষ কেইটামান ধৰ্মৰহে প্ৰাৰ্থনা স্বাধীনতা,মন্দিৰত যোৱাৰ স্বাধীনতা ভংগৰ কথা উল্লেখ আছে ৷ পূৰ্বৰ বিলখনত নিৰ্দিষ্ট চন,তাৰিখ উল্লেখ নথকাৰ বিপৰীতে এইবাৰ 31 ডিচেম্বৰ 2014 চনৰ পূৰ্বে অহা 6টা ধৰ্মৰ লোকসকলক বিদেশী বুলি গণ্য নকৰাৰ কথা সন্নিৱিষ্ট আছে ৷
তদুপৰি কেব সম্পৰ্কত টি এম চি-ৰ কেবাগৰাকীও শীৰ্ষনেতাই অখিল গগৈৰ সৈতে যোগাযোগ কৰাৰ কথা উল্লেখ কৰে কৃষক মুক্তিৰ নেতা গৰাকীয়ে ৷ ইপিনে কৃষক মুক্তিৰ সৈতে কেব সম্পৰ্কত আম আদমী পাৰ্টিয়েও বিৰোধিতা অব্যাহত ৰাখিব বুলি গগৈয়ে উল্লেখ কৰে ৷ ইফালে মুখ্য বিৰোধী দল কংগ্ৰেছে কেবৰ বিৰোধিতাৰ প্ৰসংগত আৰ জে ডি-ৰ সৈতে যোগাযোগ স্থাপন কৰিছে ৷ কংগ্ৰেছকে ধৰি 13 টা বিৰোধী দলে কেবৰ বিৰুদ্ধে ভোট প্ৰদান কৰিব বুলি ইতিমধ্যে আশ্বস্ত কৰা বুলি মন্তব্য কৰে অখিল গগৈয়ে ৷ কিন্তু এইক্ষেত্ৰত বি পি এফ দলৰ ৰাজ্যসভাৰ সাংসদ কেইগৰাকীৰ লগতে অগপৰ বীৰেন্দ্ৰ প্ৰসাদ বৈশ্যৰ ভূমিকা সন্দেহজনক বুলি নেতাগৰাকীয়ে সংবাদমেলখনত প্ৰকাশ কৰে ৷
সময়ে সময়ে অসমৰ বিভিন্ন সমস্যাৰ হকে মাত মাতি অহা সদৌ অসম ছাত্ৰ সন্থা,অসম জাতীয়তাবাদী যুৱ ছাত্ৰ পৰিষদ, বিভিন্ন দল-সংগঠনক ঐক্যবদ্ধভাৱে সংগ্ৰাম চলাই নিবলৈ আহ্বান কৰে অখিল গগৈয়ে ৷ আনহাতে, নেছ’ই আহ্বান কৰা অসম বন্ধলৈ পূৰ্ণ সমৰ্থন আগবঢ়োৱাৰ লগতে শান্তিপূৰ্ণভাৱে বন্ধ পালনৰ আহ্বান জনায় কৃষক মুক্তি সংগ্ৰাম সমিতিয়ে ৷ উল্লেখ্য যে, 9 ডিচেম্বৰৰ দিনটোত কেইবাটাও দল-সংগঠনে অসম বন্ধৰ আহ্বান জনাইছে ৷
বন্ধৰ পিছত কৃষক মুক্তিৰ তৰফৰ পৰা জোঁৰ সমদলৰ কাৰ্যসূচী পালন কৰা হ’ব ৷ অহা 11 ডিচেম্বৰৰ পৰা গাঁৱে গাঁৱে কৃষক মুক্তি সংগ্ৰাম সমিতিয়ে কেব সম্পৰ্কে চলাব অভিযান ৷ তদুপৰি কেব সমৰ্থনকাৰী প্ৰত্যেক দলৰে নেতাসকলক পদত্যাগ কৰিবলৈ কয় অখিল গগৈয়ে ৷ লগতে কেব বিৰোধী প্ৰতিবাদত অংশ লোৱা প্ৰতিগৰাকী সদস্যক কৃষক মুক্তি সংগ্ৰাম সমিতিৰ তৰফৰ পৰা ধন্যবাদ জ্ঞাপন কৰে অখিল গগৈয়ে ৷
লগতে চাওকঃকেবৰ বিৰুদ্ধে ৰুদ্ৰবিপ্লৱ ছিক্কিম বিশ্ববিদ্যালয়ৰ ছাত্ৰ ছাত্ৰীৰ
