গুৱাহাটী , 2 ডিচেম্বৰঃ কেব সন্দৰ্ভত গৃহমন্ত্ৰী অমিত শ্বাহৰ সৈতে দল-সংগঠনৰ আলোচনা এক ভেকোঁভাওনা আছিল বুলি মন্তব্য কৃষক মুক্তি সংগ্ৰাম সমিতিৰ উপদেষ্টা অখিল গগৈৰ ৷ সোমবাৰে সংগঠনটোৰ গান্ধীবস্তিস্থিত মুখ্য কাৰ্যালয়ত এক সংবাদমেল অনুষ্ঠিত কৰি অখিল গগৈয়ে কয় যে, কেব সম্পর্কত এক ভ্ৰান্তি বিয়পাই দিয়া হৈছে । বিধেয়কখন গৃহীত হ'লে ইনাৰ লাইন পাৰ্মিট থকা ৰাজ্যয়ো ৰেহাই নাপাব ৷ ব্ৰহ্মপুত্ৰ উপত্যকা আৰু মণিপুৰৰ ইম্ফল ভেলী আদি ঠাইত বিশেষভাৱে প্ৰভাৱ পৰিব । অৰুণাচল প্ৰদেশক কেবৰ আওঁতাৰ পৰা বাহিৰত ৰখা হৈছে বুলি কোৱা হৈছে যদিও প্ৰকৃততে সেইয়া নহয় ৷ অৰুণাচল প্ৰদেশত প্ৰৱেশৰ বাবে যি ইনাৰ লাইন পাৰ্মিট লাগে সেইয়াহে বাহাল থাকিব ৷
অখিল গগৈয়ে কয় যে, "কেব আহিলে অসমীয়া ভাষা-সংস্কৃতিৰ ওপৰত প্ৰভাৱ পৰিব । অসম গণ পৰিষদ আৰু বিপিএফে আত্মসমৰ্পণ কৰিছে দিল্লীৰ ওচৰত । অসম সাহিত্য সভায়ো "ভাষা- সংস্কৃতিক ৰক্ষা কৰিলেই হ'ব" আদি মন্তব্যৰে বিশ্বাসঘাটকতা কৰিলে । কেন্দ্ৰৰ বিৰুদ্ধে যাতে কোনেও সৱল স্থিতি গ্ৰহণ কৰিব নোৱাৰে তাৰ বাবেই এই বিধেয়কখন অনা হৈছে । নাগৰিকত্ব সংশোধনী বিধেয়কখন গৃহীত কৰাৰ পাছত সাংবিধানিক ৰক্ষা কৱচ দিয়াৰ সন্দৰ্ভত নেতাজনে কয় যে , "সাংবিধানিক সুৰক্ষা কৱচে অসমীয়া জাতিক বচাব নোৱাৰে ৷"
অসমীয়া জাতিয়ে আশংকাৰ মাজত দিন কটাইছে বুলি মন্তব্য কৰি অখিল গগৈয়ে বিধেয়কখনৰ বিৰুদ্ধে হ'ব লগা ধাৰাবাহিক আন্দোলনত অসমৰ ৰাইজক অংশগ্ৰহণ কৰিবলৈ আহ্বান জনায় ৷ উল্লেখযোগ্য যে, 5 ডিচেম্বৰত দিছপুৰ লাষ্টগেটত বিশাল গণ-ধৰ্ণা কাৰ্যসূচী গ্ৰহণ কৰিব কৃষক মুক্তি সংগ্ৰাম সমিতিয়ে ৷
লগতে পঢ়কঃগুৱাহাটীত অনুষ্ঠিত হ’ব ‘টইছা’
