গুৱাহাটী, ১৩ অক্টোবৰ: ঐতিহাসিক অসম আন্দোলনৰ পটভূমিত আত্মপ্ৰকাশ ঘটা আঞ্চলিক ৰাজনৈতিক দল অসম গণ পৰিষদৰ শনিবাৰে ৩৯ সংখ্যক প্ৰতিষ্ঠা দিৱস । অসমৰ ৰাজনৈতিক ইতিহাসত সুদীৰ্ঘ ৩৮ বছৰীয়া পৰিক্ৰমাৰ সমাপ্তি ঘটাই শনিবাৰে ৩৯ বছৰত ভৰি দিব আঞ্চলিক দলটোৱে । জন্মস্থান গোলাঘাটত দলটোৰ প্ৰতিষ্ঠা দিৱস উদযাপন কৰা হ'ব ।
অগপৰ ৩৯ সংখ্যক প্ৰতিষ্ঠা দিৱস কেন্দ্ৰীয়ভাৱে অগপৰ গোলাঘাট জিলা সমিতিৰ উদ্যোগত ঐতিহাসিক গোলাঘাট চহৰৰ সমন্বয় ক্ষেত্ৰত অনুষ্ঠিত কৰা হ'ব । ইতিমধ্যে প্ৰস্তুতি সম্পূৰ্ণ কৰি তোলা হৈছে । প্ৰায় সংখ্যক দলীয় নেতৃত্বও উপস্থিত হৈছে গোলাঘাটত । শনিবাৰে দিনজোৰা কাৰ্যসূচীৰে প্ৰতিষ্ঠা দিৱস পালন কৰা হ'ব ।
কাৰ্যসূচী অনুসৰি পুৱা ১০ বজাত দলৰ পতাকা উত্তোলন কৰাৰ পাছতে ১০.১৫ বজাত শহীদ তর্পণ কৰা হ'ব। পুৱা ১০.৩০ বজাত সতীর্থ সোঁৱৰণৰ পাছতে দিনৰ ১১ বজাৰ পৰা অনুষ্ঠিত হ'ব মুকলি সভা । এই সভাত শ্বহীদ পৰিয়াল, জ্যেষ্ঠ দলীয় সদস্য আৰু শুভাকাংক্ষীক সম্বর্ধনা জনোৱা হ'ব । বিয়লি ৫ বজাত বন্তি প্ৰজ্বলন কৰা হ'ব । অগপৰ সভাপতি অতুল বৰা আৰু কাৰ্যকৰী সভাপতি কেশৱ মহন্তই প্ৰতিষ্ঠা দিৱসৰ কাৰ্যসূচীত ৰাইজৰ উপস্থিতি আৰু সহায়-সহযোগ কামনা কৰিছে ।
উল্লেখ্য যে ঐতিহাসিক অসম আন্দোলনৰ পটভূমিত ১৯৮৫ চনৰ ১৪ অক্টোবৰত গোলাঘাটত অগপই জন্ম লাভ কৰিছিল । সেই সময়তে নতুন ৰাজনৈতিক দলটোৱে আছুৰ সভাপতি প্ৰফুল্ল কুমাৰ মহন্তক সভাপতি হিচাপে নিৰ্বাচিত কৰিছিল । ইয়াৰ পৰৱৰ্তী সময়ত ১৯৮৫ চনৰ ডিচেম্বৰ মাহত অনুষ্ঠিত হোৱা বিধানসভা নিৰ্বাচনত প্ৰতিদ্বন্দ্বিতা কৰি ৬৭ খন আসন লাভ কৰি চৰকাৰ গঠন কৰে অগপ দলে ।
ইয়াৰ পিছত ১৯৯৬ চনৰ নিৰ্বাচনত জয়ী হৈ পুনৰ চৰকাৰ গঠন কৰে আঞ্চলিক দলটোৱে । দলীয় নেতা প্ৰফুল্ল কুমাৰ মহন্তই দুটা কার্যকাল অসমৰ মুখ্যমন্ত্ৰী হিচাপে কাৰ্যনিৰ্বাহ কৰিছিল ৷
উল্লেখ্য যে, ২০০৬ চনত দলটোত এটা বৃহৎ বিভাজন আহে । দলটোৰ প্ৰতিষ্ঠাপক সভাপতি প্ৰফুল্ল কুমাৰ মহন্তই নিজৰ সমৰ্থকসকলক লৈ অসম গণ পৰিষদ প্ৰগতিশীল নামেৰে আন এটা নতুন দল গঠন কৰে । কিন্তু দলটোৱে ৰাইজৰ সমৰ্থন লাভ কৰাত ব্যৰ্থ হয় ।
ইয়াৰ পাছত ২০০৮ চনৰ ১৪ অক্টোবৰত গোলাঘাটত অনুষ্ঠিত অগপৰ প্ৰতিষ্ঠা দিৱসত দুই দলৰ মিলন ঘটে আৰু অসম গণ পৰিষদ প্ৰগতিশীল ভংগ হয় । ২০১৬ চনৰ বিধানসভা নিৰ্বাচনত দলটোৱে ১৪ খন আসনত লাভ কৰি বিজেপি মিত্ৰজোঁটৰ চৰকাৰৰ অংশীদ্বাৰ হয় । দুবাৰকৈ শাসনৰ গাদীত বহা আঞ্চলিক দলটোৱে বৰ্তমান ৰাষ্ট্ৰীয় দল বিজেপিৰে মিত্ৰতা কৰি চৰকাৰৰ অংশীদাৰ হৈ আছে ।
লগতে পঢ়ক: MP Pabitra Margherita slams Congress: মে'ৰ পিচত ভূপেন বৰাৰ বিদায় নিশ্চিত :পবিত্ৰ মাৰ্ঘেৰিটা
