গুৱাহাটী, 25 জুলাইঃ ৰাজ্যত উজনিৰ পৰা নামনি লৈকে বলিয়া বানৰ সংহাৰী ৰূপ অব্যাহত থকাৰ ফলত ক্ৰমাৎ অধিক জটিল হৈ পৰিছে ৰাজ্যৰ বান পৰিস্থিতি ৷ প্ৰতিদিনে নৈ-উপনৈ সমূহৰ পানী বৃদ্ধি পোৱাত প্লাবিত হৈছে ন ন অঞ্চল ৷ উফন্দি উঠা নৈ-উপনৈ সমূহৰ পানীৰ তলত ডুব গৈছে ৰাজ্যৰ বিস্তীৰ্ণ অঞ্চল ৷ বাঢ়নী পানীৰ মাজত ককবকাইছে লাখ লাখ লোক ৷
শনিবাৰে বৰষুণৰ মাত্ৰা কিছু হ্ৰাস পাইছে যদিও ৰাজ্যৰ বান পৰিস্থিতিৰ কোনো পৰিৱৰ্তন হোৱা নাই ৷ বৰঞ্চ অধিক বৃদ্ধিহে পাইছে ৷ শনিবাৰৰ দিনটোত ৰাজ্যৰ বান প্ৰভাৱিত জিলাৰ সংখ্যা ২৬ পৰা ২৭ লৈ বৃদ্ধি পাইছে ৷ ইপিনে মৰিগাঁও জিলাৰ মায়ঙত বানৰ ফলত পুনৰ এজন লোকৰ মৃত্যু হোৱাত চলিত বছৰত মৃতকৰ সংখ্যা ৯৭ লৈ বৃদ্ধি পাইছে ৷
ৰাজ্যিক দুৰ্যোগ ব্যৱস্থাপনা বিভাগৰ তথ্য অনুসৰি শনিবাৰ সন্ধিয়াৰ ভাগলৈ ৰাজ্যত ৩৩ খন জিলাৰ ভিতৰত ২৭ খন জিলাৰ ৭১ টা ৰাজহ চক্ৰৰ ২,৩৭০ খন গাঁও বাঢ়নী পানীৰ তলত ডুব গৈ আছে ৷ বানপানীৰ ফলত বৰ্তমানলৈকে ৰাজ্যত প্ৰভাৱিত হৈ আছে ২৬,৩৭,৫১৩ গৰাকী লোক ৷
বান প্ৰভাৱিত লোক সকলৰ ভিতৰত লক্ষাধিক লোকে চৰকাৰী আশ্ৰয় শিবিৰত আশ্ৰয় লোৱাৰ লগতে বহু লোকে পথৰ কাষত আৰু মাথাউৰিৰ ওপৰতো আশ্ৰয় লবলৈ বাধ্য হৈছে ৷ ইফালে বৰ্তমানেও বানৰ কবলত আছে ৰাজ্যৰ ১,১৬,৯৩৯.৬৮ হেক্টৰ কৃষি ভূমি ৷
লগতে পঢ়কঃ মালিগাঁৱৰ অপ্ৰীতিকৰ পৰিস্থিতিৰ বাবে আৰক্ষীক জগৰীয়া কিয় !
