যোৰহাট, 15 জুন : মহামাৰী কৰ'ণাৰ সংহাৰৰ পৰা সৰ্ব সাধাৰণক মুক্ত কৰি ৰখাৰ বাবে ৰাজ্য তথা কেন্দ্ৰীয় চৰকাৰে বলৱৎ কৰা সান্ধ্য আইন, আংশিক লক ডাউনে একপ্ৰকাৰ জুৰুলা কৰিছে সৰ্ব সাধাৰণক ৷ বিগত বছৰৰ পৰা কালৰূপ ধাৰণ কৰা কৰ'ণাই হাজাৰজনক কৰিলে কৰ্মহীন ৷
বহিঃৰাজ্যত কৰ্মৰত হাজাৰ লোক স্ব-গৃহলৈ উভতি অহাত একপ্ৰকাৰ নিবনুৱা সমস্যাই ৰাজ্যত লৈছে ভয়াৱহ ৰূপ ৷ এনে সংকটময় পৰিৱেশৰ মাজতে যোৰহাটৰ দুই যুৱকে দেখুৱাইছে স্বাৱলম্বিতাৰ উৎকৃষ্ট নিদৰ্শন ৷ ৰাজ্যত আংশিক লক ডাউন আৰু সান্ধ্য আইন বলৱৎ হৈ থকাৰ সময়তে অংশুমান বৰা আৰু মানসজ্যোতি বৰুৱা নামৰ দুই যুৱকে হাতত লৈছে এক ব্যতিক্ৰমী পদক্ষেপ ৷ পশ্চিম যোৰহাটৰ দুই উদীয়মান যুৱকে ঘৰতে থাকি প্ৰস্তুত কৰিছে দৈনন্দিন ব্যৱহাৰ হোৱা চেন্দেল ৷
যি সময়ত দেশ তথা ৰাজ্যৰ বৃহৎ বৃহৎ উদ্যোগৰ লগতে ক্ষুদ্ৰ উদ্যোগসমূহ প্ৰায় বন্ধ হ'বলৈ ধৰিছে, তেনে সময়তে দুই যুৱকে দহদিনীয়া এটি প্ৰশিক্ষণ লাভ কৰি নিজ ঘৰতে গঢ়ি তুলিছে এই ক্ষুদ্ৰ উদ্যোগ ৷ প্ৰায় তিনি মাহ আগতে আৰম্ভ কৰি অহা এই চেন্দেল নিৰ্মাণ উদ্যোগটোত দৈনিক 300-500 যোৰ চেন্দেল প্ৰস্তুত কৰি আহিছে দুই যুৱকে ৷ পাইকাৰী মূল্যত 60-70 টকাত প্ৰতিযোৰ চেন্দেল বিক্ৰী কৰাৰ পৰিৱৰ্তে 120-140 টকা খুচুৰা মূল্যত যোৰহাটৰ লগতে আন আন ঠাইত বিক্ৰী কৰি আহিছে চেন্দেল ৷
উল্লেখ্য যে, ৰাজধানী চহৰ দিল্লীত উচ্চ শিক্ষাৰে শিক্ষিত দুই যুৱকে এতিয়া নিজৰ লগতে স্থানীয় আন বহুজনক নিজৰ এই উদ্যোগত সংস্থাপন দি আহিছে ৷ চেন্দেলৰ ব্যৱসায়েৰে স্বাৱলম্বী হোৱা দুই যুৱক অংশুমান আৰু মানসে ইংক্ৰুভেটৰৰ জৰিয়তে ব্যৱসায় আৰম্ভ কৰিছিল ৷
সম্প্ৰতি দুই যুৱকে এ এম ইণ্ড্ৰাষ্ট্ৰী নামৰে ঘৰতে চেন্দেল প্ৰস্তুত কৰা পাচত তৃপ্তি নামেৰে আন এটা মচলা উদ্যোগো গঢ়ি তুলিছে ৷ যোৰহাটৰ এই দুই যুৱকৰ এই প্ৰচেষ্টাক এতিয়া সকলোৱে প্ৰশংসা কৰিছে ৷
লগতে পঢ়ক: গভীৰ সংকটত ৰঙিয়াৰ বাছৰ মালিক আৰু কৰ্মচাৰী
