যোৰহাট, 14 মাৰ্চ : ৰাজ্যত মেট্ৰিকৰ প্ৰশ্নৰ ক’লা বজাৰ ৷ পৰীক্ষাৰ পূৰ্বেই ম’বাইলে ম’বাইলে ভাইৰেল হৈছে প্ৰশ্নকাকত ৷ ইয়াৰ সমান্তৰালকৈ এতিয়া হোৱাটছ এপত উপলব্ধ হৈছে উচ্চতৰ মাধ্যমিক পৰীক্ষাৰ ৰসায়ন বিজ্ঞান বিষয়ৰ প্ৰশ্নকাকত ৷ সোমবাৰে তিতাবৰ প্ৰাগজ্যোতিকা নামৰ ৰাজ্যৰ এখন আগশাৰী শিক্ষানুষ্ঠানৰ বিকি ডোল্লা নামৰ এগৰাকী বিজ্ঞান শিক্ষকে উচ্চতৰ মাধ্যমিক পৰীক্ষাৰ প্ৰশ্ন কাকত ফাদিল হোৱা বুলি তথ্য পোহৰলৈ আনিছিল । বিজ্ঞান শিক্ষক বিকি ডোল্লাই প্ৰশ্নকাকত প্ৰদান কৰা দুটা হোৱাটছ এপ্প নম্বৰ ৰাজহুৱা কৰাৰ পিচতে ৰাজ্যজুৰি তোলপাৰ লাগিছিল (Teacher complaint on paper leaked) ৷
বিজ্ঞান শিক্ষক বিকি ডোল্লাই উল্লেখ কৰা অনুসৰি উক্ত হোৱাটছ এপ্প নম্বৰ দুটাৰ পৰাই শিক্ষাৰ্থীলৈ মেছেজ আহিছিল পেপাৰ লাগিব নেকি বুলি ৷ লগতে মেছেজত উল্লেখ কৰা হৈছিল প্ৰশ্নৰ নম্বৰ অনুযায়ী নিৰ্ধাৰিত মূল্য ৷ 15 মাৰ্কৰ পেপাৰৰ বাবে 3000 টকা, সম্পূৰ্ণ পেপাৰ বাবে 15 হাজাৰৰ পৰা 20 হাজাৰ টকা ৷ এই মেছেজ লাভ কৰাৰ পিচতেই বহুসংখ্যক শিক্ষাৰ্থীয়ে প্ৰশ্নকাকত ক্ৰয় কৰাৰ অডিঅ’ ৰেকৰ্ডিং, ধনৰ লেনদেন হোৱা Google pay ৰ স্ক্ৰীন শ্ব’ট ৰ লগতে বিভিন্ন কথোপকথনৰ মেচেঞ্জাৰৰ স্ক্ৰীণ শ্ব’ট শিক্ষকগৰাকীয়ে সামাজিক মাধ্যমত ৰাজহুৱা কৰিছিল (HS exam question paper leaked) ৷
সোমবাৰে সংবাদ মাধ্যমৰ আগত কি দৰে প্ৰশ্নকাকত ফাদিল হৈছিল সেয়া সংবাদমাধ্যমৰ আগত উল্লেখ কৰিছিল বিজ্ঞান শিক্ষকগৰাকীয়ে ৷ শিক্ষকগৰাকীৰ চাঞ্চল্যকৰ ভাষ্যই ৰাজ্যত প্ৰশ্নকাকত ফাদিল কৰাৰ নামত চলি থকা এখন ভয়ংকৰ বজাৰ চলি থকাৰ উমান দিছিল (Question paper leak issue in Assam) ৷
ইয়াৰ পিচতেই মঙলবাৰে যোৰহাট আৰক্ষীয়ে বিজ্ঞানৰ শিক্ষক বিকি ডোল্লাক আটক কৰি সোধা পোছা কৰে ৷ ইফালে আৰক্ষীৰ জেৰাত বিকি ডোল্লাই সামাজিক মাধ্যমত প্ৰদান কৰা তথ্যসমূহ সম্পূৰ্ণৰূপে মনেসজা আৰু ভুৱা বুলি সদৰী কৰিছে (Teacher detained in Jorhat) ৷
এই সন্দৰ্ভত আৰক্ষী অধীক্ষক মোহন লাল মিনাই সংবাদমাধ্যমক সম্বোধি কয় যে, বিকি ডোল্লাই সদৰী কৰা অনুসৰি শিক্ষাৰ্থীক বিক্ৰী কৰা প্ৰশ্নসমূহ হাতে লিখা আছিল ৷ এই প্ৰশ্নসমূহ পৰীক্ষাত অহা প্ৰশ্নৰ লগত একেবাৰে মিলা নাছিল ৷ দ্বিতীয়তে শিক্ষকগৰাকীয়ে ৰসায়ন বিজ্ঞানৰ প্ৰশ্ন কাকত ফাদিল কৰাৰ অভিযোগ উত্থাপন কৰিছিল (HS Chemistry question paper leak) ৷
তেওঁ লগতে কয়, ‘‘আমি তেওঁৰ মোবাইল ফোন পৰীক্ষা কৰিছিলো কিন্তু তেওঁৰ ফোনত তেনেকুৱা কোনো ধৰণৰ তথ্য নাপালো ৷ তেওঁৰ ওচৰত পুৰণি প্ৰশ্ন কাকতৰ এটা এডিচ কৰা স্ক্ৰীণ শ্ব’ট আছিল ৷ আৰক্ষীৰ জেৰাত তেওঁ নিজেই সদৰী কৰিছে যে তেনেকুৱাধৰণৰ প্ৰশ্ন কাকত ক্ৰয় কৰা হোৱা নাছিল ৷ শিক্ষাৰ্থীক ভুৱা প্ৰশ্নকাকত বিক্ৰী কৰা হৈছিল’’ ৷
লগতে আৰক্ষী অধীক্ষকগৰাকীয়ে কয় যে, ভুৱা তথ্যৰে সকলোকে বিপথে পৰিচালিত কৰাৰ বাবে বিজ্ঞান শিক্ষক বিকি ডোল্লাক আইনৰ অধীনত কঠোৰ শাস্তি প্ৰদান কৰা হ’ব ৷
স্মৰ্তব্য যে, শিক্ষকগৰাকীয়ে মন্তব্য প্ৰকাশ কৰিছিল যে, কোনো অসাধু চক্ৰয়ে বিভিন্ন কৌশল অৱলম্বন কৰি মেট্ৰিক পৰীক্ষাৰ প্ৰশ্ন কাকত ফাদিল কৰি সম্পূৰ্ণ পৰীক্ষা ব্যৱস্থাত কালিমা সানিছ ৷ কোনো এটা পৰীক্ষাই সম্পূৰ্ণ নিকা ব্যৱস্থাৰে হোৱা নাই ৷ শিক্ষক গৰাকীয়ে এই মন্তব্য প্ৰকাশ কৰাৰ পিচতেই হাহাকাৰ লাগিছিল ৷ শিক্ষক বিকি ডোল্লাই ভুৱা প্ৰচাৰ চলাই শিক্ষাৰ্থীৰ লগতে একাংশ লোকক বিপথে পৰিচালিত কৰিব বিচাৰিছিল বুলি আৰক্ষীয়ে জানিবলৈ দিয়ে ৷
লগতে পঢ়ক : HSLC question paper leaked: ৰাজ্যত প্ৰশ্নকাকতৰ বজাৰ; এখন প্ৰশ্নকাকতৰ দাম 15-20 হাজাৰ টকা
