যোৰহাট,13 মে’: যোৰহাটত সংঘটিত হৈছে ক্ৰমাগত দ্বিতীয়টো আত্মহত্যাৰ ঘটনা ৷ মংগলবাৰে অসম কৃষি বিশ্ববিদ্য়ালয় চৌহদত এজন অধ্যাপকে আত্মহত্যা কৰাৰ 24 ঘণ্টা অতিক্ৰম নকৰোতেই চহৰখনৰ এজন যুৱকে আত্মহত্যা কৰে ৷ যোৰহাটৰ ফুকন আলিত সংঘটিত হৈছে এই ঘটনা ৷ পল্লৱ গগৈ নামৰ যুৱকজনে বাস কৰা কোঠাৰ চিলিঙত চিপ লৈ আত্মহত্যা কৰে ৷ যোৰহাট আই টি আইত অধ্যয়নৰত যুৱকজনৰ ঘৰ ধেমাজি জিলাৰ ঢকুৱাখনাৰ সাপতিয়াত ৷
এইপৰ্যন্ত যুৱকজনৰ আত্মহত্যাৰ কাৰণ জানিব পৰা হোৱা নাই ৷ বিগত প্ৰায় এবছৰে উক্ত ঘৰটোত পেয়িং গেষ্ট হিচাপে বাস কৰিছিল ধেমাজিৰ যুৱকজনে ৷ লক্ ডাউনৰ পূৰ্বে ঢকুৱাখনাৰ ঘৰলৈ যোৱা যুৱকজন এমাহৰ পূৰ্বে যোৰহাটলৈ ঘূৰি আহিছিল ৷ একেৰাহে দুদিনত যোৰহাটত সংঘটিত দুটাকৈ আত্মহত্যাৰ ঘটনাই স্বাভাৱিকতে চহৰখনত সৃষ্টি কৰিছে চাঞ্চল্যৰ ৷ ঘটনাস্থলীত আৰক্ষী উপস্থিত হৈ প্ৰাথমিক তদন্ত আৰম্ভ কৰাৰ লগতে মৃতদেহৰ মৰণোত্তৰ পৰীক্ষাৰ ব্যৱস্থা কৰে ৷
লগতে চাওকঃ ভয়ংকৰ অগ্নিকাণ্ডত জাহ গ'ল অৰ্ধশতাধিক দোকান !
