টীয়ক,15 এপ্ৰিলঃ বহাগৰ বতৰত হতাশ টীয়কৰ এগৰাকী মহিলা ঢুলীয়া ৷ নাম তেওঁৰ সংযুক্তাশ্ৰী বৰা ৷ সমুহ ৰাইজক চৰকাৰৰ নীতি নিৰ্দেশনা মানিবলৈ আহ্বান মহিলা ঢুলীয়া সংযুক্তাশ্ৰী বৰাৰ ৷
ইতিমধ্যে সমগ্ৰ বিশ্বতেই কৰ'ণা ভাইৰাছে লাখ লাখ মানুহৰ প্ৰাণ কাঢ়ি নিছে ৷ এতিয়াও দেশত অব্যাহত আছে লক ডাউন ব্যৱস্থা ৷ ৰঙালী বিহুৰ বাবে ৰাইজ তথা সাজু হৈছিল টীয়কৰ অন্যতম মহিলা ঢুলীয়া সংযুক্তাশ্ৰী বৰাও । ইতিমধ্যে অসমৰ বিভিন্ন বিহু মঞ্চত সমাদৰ লাভ কৰিবলৈ সক্ষম হোৱা সংযুক্তাশ্ৰীয়ে এতিয়া মনৰ হেঁপাহত ঘৰতে কান্ধত ঢোলটো লৈ চাপৰ মাৰিছে । বিহুৰ মঞ্চত এইবাৰ ঢোল বাদন কৰিবলৈ নাপায় এই গৰাকী শিল্পী হতাশ যদিও দেশ তথা মানৱ জাতিৰ জটিল সময়ত লক ডাউন সমৰ্থন কৰিবলৈ ৰাইজক আহ্বান জনায় ৷ নিজ ঘৰতে আবদ্ধ হৈ দেশ তথা মানৱ জাতিৰ সুস্থতা কামনা কৰিছে মহিলা ঢুলীয়া গৰাকীয়ে। লগতে স্বাস্থ্যতকৈ বিহু ডাঙৰ নহয়,সেয়ে এইবাৰ ঘৰতে আবদ্ধ থাকি অহাবাৰলৈ দুগুণ উৎসাহেৰে অসমীয়াৰ প্ৰাণৰো প্ৰাণ ৰঙালীক আদৰিব বুলি সমূহ অসমবাসীক আহ্বান জনাইছে উদীয়মান শিল্পীগৰাকীয়ে ।
