টীয়ক,৫ আগষ্ট: ৰাজ্যৰ ক্ৰীড়া ক্ষেত্ৰত আমোল পৰিৱৰ্তন অনাৰ কথা কোৱা চৰকাৰখনৰ দিনত এখন খেলপথাৰে উদঙাইছে উন্নয়ণৰ ফোঁপোলা স্বৰূপ । এফালে ৰাজ্যত ইখনৰ পাছত সিখনকৈ ৰাষ্ট্ৰীয় পৰ্যায়ৰ প্ৰতিযোগিতা অনুষ্ঠিত কৰা হৈছে সেই সময়তে এখন খেলপথাৰৰ বাবে ৰাজ্যৰ খেলুৱৈসকল থমকি ৰ'বলগা হৈছে ।
একেই সমস্যাৰ সন্মুখীন হৈছে টীয়কৰ একাংশ খেলুৱৈ । টীয়কৰ খেলুৱৈসকলৰ অনুশীলনৰ বাবে থকা একমাত্ৰ খেলপথাৰ টীয়ক হাইস্কুলৰ খেলপথাৰখনৰ কৰ্দযৰূপে খেলুৱৈসকলক অনুশীলনত বাধাৰ সৃষ্টি কৰিছে । খেলপথাৰখনৰ কাষেৰে বৈ যোৱা টীয়ক নদীৰ জলপৃষ্ঠ সামান্য বৃদ্ধি পালেই বুৰাই পেলাই খেলপথাৰখন ।
পূৰ্বতে নদীৰ এই বাঢ়নী পানীয়ে এদিন বা দুদিন খেলপথাৰখন বুৰাই ৰাখিলেও নদীৰ জলপৃষ্ঠ হ্ৰাস পোৱা লগে লগে খেলপথাৰৰ পৰাও পানী ওলাই গৈছিল । কিন্তু টীয়ক পৌৰসভাই অপৰিকল্পিতভাৱে খেলপথাৰখনৰ কাষত নিৰ্মাণ কৰা পকী নলাৰ ত্ৰুটিপূৰ্ণ কামৰ বাবে খেলপথাৰখনৰ পানী নিস্কাষণৰ পৰিবৰ্তে আৱদ্ধ হৈ থকাত খেলপথাৰখনৰ এনে এক অচলাৱস্থাৰ সৃষ্টি হোৱাত খেলুৱৈ,ক্ৰীড়া সংগঠকসকলৰ মাজত প্ৰতিক্ৰিয়াৰ সৃষ্টি হৈছে ।
