যোৰহাট, ২ জুন : জীয়াই থকাৰ বাবে প্ৰয়োজন হোৱা ন্যূনতম সা-সুবিধা খিনিৰ পৰাও বঞ্চিত হৈছে যোৰহাটৰ পতিয়া গাঁৱৰ বামুণৰ চুকৰ এক দম্পতী । ঘৰ বুলিবলৈ আছে মাথোঁ এখন টিনপাতৰ চালি আৰু ভগা বেৰকেইখন । এজাক বৰষুণতে ঘৰৰ ভিতৰত কৰ্দযময় পৰিৱেশৰ সৃষ্টি হয় । এসময়ত ঘৰে ঘৰে বাতৰি কাকত বিলাইছিল ঘৰটোৰ গৰাকী সুৰেণ শৰ্মাই । পিছত তেওঁ গাঁৱৰ ৰাজহুৱা কামত ব্যস্ত হৈ পৰে । কিন্তু অকস্মাতে পৰি শৰীৰত আঘাত পোৱাৰে পৰা শয্যাশায়ী হয় বৃদ্ধগৰাকী । যোৰহাটত চিকিৎসা কৰিও কোনো সুফল পোৱা নাই তেওঁলোকে । উন্নত চিকিৎসা দূৰৰে কথা দুবেলা-দুমুঠি যোগাৰ কৰিবলৈ চিন্তা কৰিবলগীয়া হৈছে পৰিয়ালটোৱে ।
এতিয়া ঘৰখনৰ একমাত্ৰ উপাৰ্জনকাৰী হৈছে সুৰেণ শৰ্মাৰ পত্নী । আনৰ ঘৰত কাম কৰি সুৰেণ শৰ্মাৰ পত্নীয়ে কোনোমতে ঘৰখনৰ খৰচ বহন কৰি আছে । এনে পৰিস্থিতিত তেওঁ স্বামীৰ উন্নত চিকিৎসাৰ ব্যৱস্থা কৰাবলৈ অপাৰগ । উজ্জলা যোজনা, অৰুণোদয় আঁচনিৰ সুবিধাকে ধৰি চৰকাৰী আঁচনিৰ সুবিধাও লাভ কৰা নাই বুলি অভিযোগ তুলিছে সুৰেণ শৰ্মাৰ পত্নী ।আনকি চৰকাৰী গৃহ এটাও পোৱা নাই নিঃসন্তান দম্পতীয়ে । বিগত আঠ বছৰে অসুস্থ হৈ আছে ৭৩ বছৰীয়া সুৰেণ শৰ্মা । এতিয়া খোজ কাঢ়িবলৈও অসমৰ্থ বৃদ্ধ লোকজন ।
আনহাতে, এই ঘটনাৰ বিষয়ে অৱগত হোৱাৰ পাছত সদৌ অসম ছাত্র সন্থাৰ যোৰহাট জিলা সমিতিৰ সভাপতি বিজয় শংকৰ বৰদলৈৰ নেতৃত্বত এটা সঁজাতি দল সুৰেণ শৰ্মাৰ বাসগৃহত উপস্থিত হয় । নিজে হাতে-কামে লাগি টিনপাত আৰু তৰ্জা বেৰেৰে বাসগৃহটো নিৰ্মাণ কৰি দিয়ে ছাত্ৰ সন্থাৰ সদস্যসকলে । চৰকাৰে আঁচনি গ্ৰহণ কৰে ঠিকেই, কিন্তু বহু দৰিদ্ৰ লোকে এনে আঁচনিৰ সুবিধা লাভৰ পৰা বঞ্চিত হ'বলগীয়া হয় । এতিয়া প্ৰশ্ন উত্থাপন হৈছে যে, কাৰ ভুলৰ বাবে প্ৰকৃত হিতাধিকাৰীয়ে এনে সুবিধা লাভৰ পৰা বঞ্চিত হৈ যাতনা ভুগিবলগীয়া হয় ।
লগতে পঢ়ক:কামপুৰত আৰক্ষীৰ জালত ড্ৰাগছসহ দুই যুৱক
