তিতাবৰ, 30 ডিচেম্বৰ : জানুৱাৰীৰ 20 তাৰিখে অনুষ্ঠিত হ’বলগীয়া ঠেঙাল কছাৰী স্বায়ত্ত শাসিত পৰিষদৰ নিৰ্বাচন (Thengal Kachari Autonomous Council election) ৰ বাবে 30 আৰু 31 ডিচেম্বৰত গ্ৰহণ কৰা হৈছে মনোনয়ন পত্ৰ ৷ পৰিষদৰ অন্তৰ্গত ৰাজ্যৰ বিভিন্ন সমষ্টিত কেইবাগৰাকীও প্ৰাৰ্থীয়ে প্ৰথম দিনটোত মনোনয়ন পত্ৰ দাখিল কৰে ৷ তিতাবৰ সমষ্টিতো বৃহস্পতিবাৰে দুগৰাকী কংগ্ৰেছ প্ৰাৰ্থীয়ে মনোনয়ন পত্ৰ দাখিল কৰে ।
তিতাবৰ মহকুমাৰ অন্তৰ্গত ঠেঙাল কছাৰী স্বায়ত্ব শাসিত পৰিষদৰ ১০ টা সমষ্টিৰ ভিতৰত দুটা সমষ্টিৰ বাবে ভাৰতীয় জাতীয় কংগ্ৰেছ দলৰ মনোনীত প্ৰাৰ্থীয়ে মনোনয়ন পত্ৰ দাখিল কৰে । পৰিষদৰ ৯ নং জালুকনিবাৰী সমষ্টিৰ পৰা কংগ্ৰেছ দলৰ প্ৰাৰ্থী পূৰ্ণেশ্বৰ শইকীয়া আৰু ৩ নং মাধপুৰ সমষ্টিৰ কংগ্ৰেছ দলৰ প্ৰাৰ্থী অনিল কছাৰীয়ে তিতাবৰৰ নিৰ্বাচনী বিষয়াৰ কাৰ্যালয়ত মনোনয়ন পত্ৰ দাখিল কৰে । মনোনয়ন পত্ৰ দাখিল কৰি দুয়োগৰাকী প্ৰাৰ্থীয়ে এশ শতাংশ জয় নিশ্চিত বুলি দাবী কৰে ৷
আনহাতে মনোনয়ন পত্ৰ দাখিলৰ প্ৰথম দিনটোত লখিমপুৰত কংগ্ৰেছৰ তুলুমণি সোণোৱাল বৰাই লখিমপুৰ পূৱ সমষ্টিৰ পৰা আৰু বিহপুৰীয়া (দক্ষিণ) সমষ্টিৰ পৰা বিজেপিৰ প্ৰাৰ্থী কেশৰাম বৰাই মনোনয়ন পত্ৰ দাখিল কৰে ।
লগতে পঢ়ক : ঠেঙাল কছাৰী স্বায়ত্ত শাসিত পৰিষদৰ নিৰ্বাচনৰ বাবে বিজেপিৰ হৈ মনোনয়ন দাখিল কেশৰাম বৰাৰ
