টীয়ক,19 অক্টোবৰঃ উজনি নামনি সংযোগকাৰী ৩৭নং ৰাষ্ট্ৰীয় ঘাইপথত সংঘটিত ভয়ংকৰ অঘটন ৷ যোৰহাট জিলাৰ টীয়ক কাকজান কমাৰখাটোৱালত সংঘটিত হয় ঘটনাটো ৷
বাইক আৰোহীৰ ওপৰত শক্তি বিভাগৰ উচ্চ ক্ষমতাসম্পন্ন বিদ্যুৎ পৰিবাহী তাঁৰ চিঙি পৰাৰ ফলতে সংঘটিত হয় অঘটন ৷ অৱশ্যে সম্ভাৱ্য বিপদৰ পৰা বাইক আৰোহী যুৱক দুজন ৰক্ষা পৰে যদিও বেয়াকৈ ক্ষতিগ্ৰস্ত হয় বাইকখন ৷ যোৰহাটৰ পৰা টীয়ক অভিমূখে গৈ থকা অৱস্থাতে ব্যক্তিগত প্ৰতিষ্ঠানত কৰ্মৰত যুৱক দুজনৰ সৈতে সংঘটিত হয় ঘটনাটো ৷
শক্তি বিভাগৰ কাণ্ডজ্ঞানহীনতা
ঘটনাৰ পিচতে উত্তপ্ত হৈ পৰে অঞ্চলটোৰ পৰিৱেশ ৷ শক্তি বিভাগৰ এনে অকৰ্মণ্য কামৰ বাবে স্থানীয় ৰাইজে ঘাইপথটো অৱৰোধ কৰি প্ৰতিবাদ সাব্যস্ত কৰে ৷ প্ৰায় ডেৰঘন্টা ধৰি পথ অৱৰোধ কৰাৰ পিচত ঘটনাস্থলীত লাহদৈগড় আৰক্ষীৰ লগতে কাকজান বিদ্যুৎ উপসংমণ্ডল কাৰ্যালয়ৰ কনিষ্ঠ অভিযন্তা আহি উপস্থিত হোৱাত পৰিস্থিতি শাম কাটে ৷
