যোৰহাট, 23 অক্টোবৰঃ যোৰহাটত চিকিৎসা মহাবিদ্যালয়ত ক্ৰমাগত হাৰত বৃদ্ধি পোৱা শিশুৰ মৃত্যুৰ পৰ্যবেক্ষণৰ বাবে বুধবাৰে চিকিৎসা মহাবিদ্যলয়খনত উপস্থিত হয় স্বাস্থ্য দপ্তৰৰ ৰাজ্যিক মন্ত্ৰী পিযুষ হাজৰিকা ৷ সমগ্ৰ ঘটনাক দুৰ্ভাগ্যজনক আখ্যা দিলে ৰাজ্যিক মন্ত্ৰীগৰাকীয়ে ৷ 1 অক্টোবৰৰ আজিলৈকে মহাবিদ্যালয়খনত 47 টাকৈ শিশুৱে মৃত্যুক সাবটি লৈছে ৷ বছৰটোৰ আন মাহৰ তুলনাত মৃত্যুৰ হাৰ 16 শতাংশলৈকে বৃদ্ধি পোৱা বুলি জনাই মন্ত্ৰীগৰাকীয়ে ৷
পৰ্যবেক্ষণৰ পাচতেই সাংবাদিকৰ আগত চিকিৎসা মহাবিদ্যালয়খনৰ দুৰ্বল আন্তঃগাথনিৰ কথা স্বীকাৰ কৰিলে স্বাস্থ্য দপ্তৰৰ মন্ত্ৰী ৰাজ্যিক মন্ত্ৰীগৰাকীয়ে ৷ আন্তঃগাঁথনি উন্নয়নৰ বাবে আগন্তুক এমাহৰ ভিতৰত প্ৰসূতি আৰু শিশু স্বাস্থ্য বিভাগৰ আই চি ইউত সংযোজন কৰা হ'ব 25 খনকৈ নতুন বিচনাৰ ৷ ইয়াৰ বাবদ প্ৰয়োজনীয় 2 কোটি ধন মোকলাই দিছে ৰাজ্য চৰকাৰে ৷ আনহাতে, অহা এসপ্তাহৰ ভিতৰত চিকিৎসা মহাবিদ্যালয়খনত নিয়োগ কৰা হ'ব ৩ গৰাকী স্ত্ৰী-ৰোগ বিশেষজ্ঞ, ২ গৰাকী শিশু ৰোগ বিশেষজ্ঞ, আৰু ২ জন এনাস্থেচিয়ান ৷
