যোৰহাট, ২৪ মে':আগন্তুক লোকসভা নিৰ্বাচনক কেন্দ্ৰ কৰি ব্যাপক তৎপৰতা আৰম্ভ হৈছে ৰাজ্য়িক বিজেপিৰ ৷ ইয়াৰ সমান্তৰালভাৱে কিন্তু বৃদ্ধি পাইছে দলটোৰ কৰ্মী সকলৰ মাজৰ বিবাদ আৰু অসন্তুষ্টি ৷ এতিয়ালৈকে প্ৰকট হৈ আহিছিল দুই ন-পুৰণি বিজেপিৰ সংঘাত ৷ এইবাৰ লাহে-লাহে মুকলি হ'বলৈ ধৰিছে তৃণমূল কৰ্মীৰ সংঘাত (Factional feud in Assam BJP) ৷ ইয়াৰ মাজতেই এনে এখন ছবি প্ৰতিফলিত হৈছে যোৰহাটত । যোৰহাট জিলা বিজেপিত আৰম্ভ হৈছে বিসম্বাদ (Conflict in Jorhat district BJP)। জিলা বিজেপি কাৰ্যালয়তেই দলীয় কৰ্মীৰ মাজত হোৱা বাক বিতণ্ডাৰ ঘটনাই সম্প্ৰতি জিলাখনত চৰ্চা লাভ কৰিছে ।
শাসনাধিষষ্ঠ বিজেপি চৰকাৰৰ নেতাসকলে দলত কোনো সংঘাত আৰু বিসম্বাদ নাই । শেহতীয়াভাৱে যোৰহাট বিজেপি কাৰ্যালয়ত সংঘটিত হোৱা এক বাক-বিতণ্ডাৰ ভিডিঅ' ছচিয়েল মিডিয়াত ভাইৰেল হোৱাৰ পিছতেই প্ৰতিক্ৰিয়াৰ সৃষ্টি হৈছে । জিলা বিজেপিত দীৰ্ঘদিনে হৈ থকা নতুন আৰু পুৰণি কৰ্মীৰ অসন্তুষ্টি তথা বিসম্বাদৰ ছৱিখন পোহৰলৈ লৈ আনিলে এই ভিডিঅ'টোই । উল্লেখ্য় যে ৰাজ্যিক বিজেপিৰ নিৰ্দেশ মৰ্মে যোৰহাট জিলা বিজেপি কাৰ্যালয়ত এখন দলীয় সভা অনুষ্ঠিত কৰা হৈছিল । এই সভাখনত যোৰহাট বিজেপিৰ সভাপতি হেমন্ত কলিতাৰ পৰা আৰম্ভ সকলো বিজেপি নেতা -কৰ্মী উপস্থিত আছিল ।
উক্ত সভাতেই বিজেপিৰ জিলা সভাপতিগৰাকীৰ স্বেচ্ছাচাৰিতাৰ লগতে বিভিন্ন সিদ্ধান্তৰ বিৰোধিতা কৰি কেইবাজনো বিজেপি কৰ্মীয়ে অসন্তুষ্টি প্ৰকাশ কৰি ক্ষোভৰ বহি:প্ৰকাশ কৰে । এই ক্ষোভৰ বহি:প্ৰকাশ এসময়ত চুড়ান্ত পৰ্যায় পায়গৈ । এগৰাকী মহিলা বিজেপি কৰ্মীয়ে চিঞৰি চিঞৰি জিলা বিজেপিৰ কৰ্মকৰ্তা ওপৰত থকা ক্ষোভৰ বহি:প্ৰকাশ ঘটায় । কেইবাগৰাকীও বিজেপি কৰ্মী জিলা কাৰ্যালয়ত অনুষ্ঠিত হোৱা সভাতেই অপদস্থ হোৱাৰ গুৰুতৰ অভিযোগ উথাপিত হৈছে ।
এতিয়া সকলোৰে মুখে মুখে যোৰহাট জিলা বিজেপিত আৰম্ভ হোৱা দলীয় বিসম্বাদে চৰ্চা লাভ কৰিছে । উল্লেখ্য যে, জিলা বিজেপিৰ সভাপতিৰ দায়িত্ব লোৱাৰ কেইমাহমান পিছৰে পৰাই সভাপতি হেমন্ত কলিতাৰ কাম -কাজক লৈ সন্তুষ্ট নাছিল দলীয় কৰ্মী সকল । ফলত তাৰ পিছৰে পৰাই বিসম্বাদৰ জুইকুৰাই উমি উমি জ্বলি এতিয়া ভয়ংকৰ ৰূপ লোৱা দেখা গৈছে ।
লগতে পঢ়ক:Tingrai road accident:টিংৰাই বগাপানীত ভয়ংকৰ পথ দুৰ্ঘটনা, থিতাতে নিহত এজন
