ঢোল পেঁপা গগণাৰ মাতত উখল-মাখল তিতাবৰ

তিতাবৰৰ বৰহোলাৰ আঞ্চলিক ছাত্ৰ সন্থাৰ উদ্যোগত বৰহোলা মহাবিদ্যালয়ৰ প্ৰাংগণত অনুষ্ঠিত হৈছে বিনামূলীয়া বিহু নৃত্য কৰ্মশালা

তিতাবৰ,৩১ মাৰ্চঃ পদূলি মুখত হেঁপাহৰ ৰঙালী বিহু । ৰাজ্যৰ চৌদিশে এতিয়া বিহুক আদৰাৰ বাবে ব্যাপক প্ৰস্তুতি । তিতাবৰো ইয়াৰ ব্যতিক্ৰম নহয় । অসমীয়াৰ বাপটি সাহোন ৰঙালী বিহুটিক আদৰিবলৈ সাজু তিতাবৰবাসী । ঢোল পেঁপা গগণাৰ মাতত ৰজনজনাইছে তিতাবৰৰ আকাশ-বতাহ । এফালে আপোনজনক বিহুৱান দিবলৈ যদি তাঁতশালত বোৱাৰীৰ ব্যস্ততা । আনফালে আকৌ নৃত্যকৰ্মশালাত ব্যস্ত কণ কণ মাইনাসকল ।

কাৰণ তিতাবৰৰ বৰহোলাআঞ্চলিক ছাত্ৰ সন্থাই বিগত চাৰিবছৰ ধৰি অসমীয়া ভাষা সংস্কৃতি নতুন প্ৰজন্মৰ মাজত জীয়াই ৰখাৰ বাবে অনুষ্ঠিত কৰি আহিছে সম্পূৰ্ণ বিনামূলীয়াকৈ বিহু নৃত্য কৰ্মশালা । শেহতীয়াকৈ এই বৰ্ষতো ২৬ মাৰ্চৰ পৰা বৰহোলা মহাবিদ্যালয়ৰ প্ৰাংগণত অনুষ্ঠিত হৈ আহিছে এই বিহু নৃত্য কৰ্মশালা । এই বিনামূলীয়া অনুষ্ঠিত হোৱা বিহু নৃত্য কৰ্মশালাত অংশগ্ৰহণ কৰিছে ২৫০ গৰাকীকৈ কণমানিয়ে ।