টীয়ক, 4 জানুৱাৰী : বুধবাৰে পুৱা দেৰগাঁৱৰ বালিজানত সংঘটিত ভয়ংকৰ পথ দুৰ্ঘটনাৰ পাছতে সমগ্ৰ অসমতে তীব্ৰ প্ৰতিক্ৰিয়াৰ সৃষ্টি হৈছে । ঘন কুঁৱলী, চালকে সুৰা সেৱন কৰা বাবে দুৰ্ঘটনাটো সংঘটিত হোৱা বুলি অভিযোগ উত্থাপন হোৱাৰ লগতে নিৰ্মীয়মান চাৰিলেনযুক্ত পথৰ দুৰৱস্থাৰ বাবেই এই দুৰ্ঘটনা সংঘটিত হৈছে বুলি সৰ্বত্ৰে চৰ্চা চলিছে ৷ অভিযোগ অনুসৰি, দুৰ্ঘটনা সংঘটিত কৰা স্থানত পথৰ ওপৰত কোনো ধৰণৰ সাংকেতিক চিহ্ন নাছিল ৷ যাৰ বাবে উক্ত দুৰ্ঘটনাটো সংঘটিত হৈছে আৰু প্ৰায় 12 জনকৈ লোকৰ মৃত্যু হৈছিল ৷
ইফালে উজনি অসমৰ অতি ব্যস্ত ৰাষ্ট্ৰীয় ঘাইপথটোৰ শামুকীয়া গতিত সম্প্ৰসাৰণ কৰি থকাৰ ফলত এই দুৰ্ঘটনা সংঘটিত হৈছে বুলি অভিযোগ উত্থাপন কৰে ৰাইজে ৷ আনহাতে যোৰহাট বাইপাছৰ পৰা টীয়কলৈ নিৰ্মীয়মান 37 নং ৰাষ্ট্ৰীয় ঘাইপথৰ দুৰৱস্থাৰ বাবে হাহাকাৰ কৰিব লগা হৈছে ৰাইজে ৷ কাৰণ ঠায়ে ঠায়ে খনন কৰাৰ ফলত সৰু বৰ পথ দুৰ্ঘটনা সংঘটিত হৈ আহিছে ৷
সেয়ে ৰাষ্ট্ৰীয় ঘাইপথছোৱাৰ নিৰ্মাণ কাৰ্য শীঘ্ৰে সম্পন্ন কৰিবলৈ দাবী উত্থাপন কৰিছে টীয়ৰ বিভিন্ন দল সংগঠনে ৷ ইফালে টীয়ক থানাৰ সন্মুখত দুটা পথৰ প্ৰায় নিৰ্মাণ কাৰ্য সম্পূৰ্ণ হৈছে যদিও পথটোত উপযুক্ত নিৰ্দেশনা নথকাৰ ফলত প্ৰায়ে সৰু বৰ দুৰ্ঘটনা সংঘটিত হৈ আহিছে বুলি অভিযাগ উত্থাপন কৰে দল-সংগঠনে ৷
দুৰ্ঘটনা সংঘটিত হোৱাৰ পাচতহে সাৰ পাব নেকি নিৰ্মাণকাৰী সংস্থাই ! দুই এক স্থানত বাহৰ গোজ মাৰিয়ে কিয় দায়িত্ব সামৰিছে প্ৰশাসনে ! এই প্ৰশ্ন কৰিছে ৰাইজে ! সেয়ে দেৰগাঁৱৰ দৰে অনুৰূপ ঘটনা যাতে টীয়কত সংঘটিত নহয় তাৰ বাবে এতিয়াই চৰকাৰ তথা প্ৰশাসনক উচিত ব্যৱস্থা গ্ৰহণ কৰিবলৈ দাবী জনাইছে টীয়কৰ বিভিন্ন দল-সংগঠনে ।
লগতে পঢ়ক : দেৰগাঁও পথ দুৰ্ঘটনা: JMCH-বচা ভৰলুৱা গাঁৱত এতিয়া কান্দোনৰ ৰোল
