হোজাই,১১ আগষ্ট: হোজাই জিলাৰ লংকাত জোনালী সন্ধ্যা শীর্ষক এক নতুন ভিডিঅ' গীত YOUTUBE জৰিয়তে মুকলি কৰা হয় । লংকাৰ জীয়ৰি সংঘমিত্ৰা গোস্বামীয়ে কণ্ঠদান কৰা উক্ত গীতটো বুধবাৰে লংকাৰ এন-এৰিয়াস্থিত সংঘমিত্ৰাৰ নিজ পিতৃগৃহত ঘৰুৱা পৰিবেশত সম্বন্ধীয়, ওচৰ চুবুৰীয়া আৰু শুভাকাঙ্ক্ষী সকলক লগত লৈ মুকলি কৰা হয়(Music video released at Hojai) ।
মাতৃ দীপিকা গোস্বামী আৰু পিতৃ মুকুট দেৱ গোস্বামীৰ কন্যা সংঘমিত্ৰা গোস্বামী সৰুৰ পৰা পঢ়া-শুনাৰ সমান্তৰাল ভাবে আছিল সংগীতৰ প্ৰতি আগ্ৰহী । নিজৰ লংকাৰ ঘৰখনত সৰুৰেই পৰা সংঘমিত্ৰাই পাইছিল সংগীতৰ এক বাতাবৰণ । পিছত ৬ বছৰ মান বয়সত সংগীতৰ গুৰু কাঞ্চন দাসৰ ওচৰত সংগীতৰ প্ৰশিক্ষণ লয় সংঘমিত্ৰা গোস্বামীয়ে ।
পঢ়া-শুনাৰ সমান্তৰাল ভাবে সংঘমিত্ৰাই কৰি লৈছিল সংগীতৰ প্ৰশিক্ষণ ও সংগীতৰ চৰ্চা । অসমৰ বিভিন্ন প্ৰান্তৰ অনুষ্ঠানত সংগীত পৰিবেশন কৰি ৰাইজৰ বিপুল সহাৰি লাভ কৰিবলৈ সক্ষম হৈছিল সংঘমিত্ৰাই । পঢ়া-শুনাৰ মাজতেই ২০১৮ চনত নগাঁও কলেজত শ্ৰেষ্ঠ গায়িকা, ২০১৯-২০২০ বৰ্ষত জে.বি.আইন মহাবিদ্যালয়ত শ্ৰেষ্ঠ গায়িকাৰ খিতাপ লাভ কৰিবলৈ সক্ষম হয় সংঘমিত্ৰা গোস্বামীয়ে ।
বৰ্তমান বিষ্ণু ৰাম মেধি চৰকাৰী আইন মহাবিদ্যালয়ত অধ্যানৰত সংঘমিত্ৰা গোস্বামীয়ে আদিগুৰু প্ৰডাক্সনৰ বেনাৰত জোনালী সন্ধ্যা শীর্ষক এটি গীত নিজে বাণীবদ্ধ কৰে । সংঘমিত্ৰাই জানিব দিয়া অনুসৰি উক্ত গীতটোৰ কথা পৰাগ দেৱ চৌধুৰীৰ আৰু সংগীত পৰিচালনা কৰিছে দেৱজিৎ চৌধুৰীয়ে ।
পিছলৈ, উক্ত গীতটো চিম্পল গগৈৰ পৰিচালনাৰে ভিডিঅ' প্ৰস্তুত কৰা হয় । ভিডিঅ'ত অভিনয় কৰে অসমৰ অভিনয় জগতৰ নৱ প্ৰজন্মৰ অভিনেতা সুভ্ৰনীল বৰা আৰু অভিনেত্রী ৰিছা ছেত্ৰীয়ে । লগতে সংঘমিত্ৰা গোস্বামীয়েও উক্ত গীতটিত ভুমুকি মাৰে । এই নতুন যাত্ৰাত উক্ত ভিডিঅ' গীতটিৰ মুকলি অনুষ্ঠানত সকলোৱে আন্তৰিক শুভেচ্ছা জ্ঞাপন কৰে সংঘমিত্ৰালৈ ।
লগতে পঢ়ক: Independence Day parade: তেজপুৰ নেহৰু মৈদানত স্বাধীনতা দিৱসৰ পেৰেড অনুশীলন
