হোজাই,২২জুলাই: হোজাই-যোগীজান সংযোগী এটা গড়কাপ্তানি পথৰ দুৰৱস্থা । মেৰামতিৰ অভাৱত পথৰ অৱস্থা হৈ পৰিছে তথৈবচ । উপায়বিহীন পথাচাৰীয়ে ইমান ভয়াৱহ অৱস্থাৰ পিছতো উক্ত পথটো ব্যৱহাৰ কৰিবলৈ হৈছে ।
পথৰ মাজত যেন খান্দিহে থৈছে একো একোটা পুখুৰী ৷ ইয়াৰ ওপৰেদিয়েই দৈনিক যাতায়ত কৰিব লগা হয় সকলোৱে ৷ পথছোৱাৰ এনে দুৰবস্থাৰ বাবে দৈনিক সংঘটিত হোৱা দুৰ্ঘটনাত বৰ্তমানলৈ আহত হৈছে বহু লোক ৷ কিন্তু ইয়াৰ পিছতো পথছোৱাৰ উন্নয়ণৰ বাবে আজিলেকৈ কোনো গুৰুত্বপূৰ্ণ পদক্ষেপ গ্ৰহণ নকৰিলে নিজকে সফল বিধায়ক বুলি দাবী কৰা স্থানীয় বিধায়ক শিলাদিত্য দেৱে।
কেৱল দলৰ মজিয়াত নিজৰ গুৰুত্ব বঢ়াবলৈকে বিভিন্ন সময়ত বিতৰ্কিত মন্তব্য কৰি সস্তীয়া প্ৰচাৰ কৰি অহা এই গৰাকী বিধায়কৰ নিজৰ সমষ্টিৰ এয়া মাথো এটা উদাহৰণহে ।
পথটোৰ পুনৰ নিৰ্মাণতো বাদেই, সংশ্লিষ্ট কতৃপক্ষৰ দ্বাৰা পথত জমা হোৱা পানীখিনি নিষ্কাষণ কৰাবলৈকো অপাৰগ এইগৰাকী বিধায়ক। উপায়ন্তৰ হৈ স্থানীয় লোক সকলেই নামি পৰিল পথত জমা হোৱা পানী নিষ্কাষণৰ কামত । বিধায়ক গৰাকীৰ এনে অদক্ষ্যতাক লৈ এতিয়া অধিক অসন্তুষ্ট হৈ পৰিছে স্থানীয় লোক সকল ।
