হোজাই, 30 আগষ্ট: দেওবাৰে হোজাই জিলাৰ কাকীত উপস্থিত হৈ কাকী মণ্ডল সমিতিৰ লগতে তৃণমূল পৰ্যায়ৰ কংগ্ৰেছ কৰ্মীসকলৰ সৈতে এক মত-বিনিময় অনুষ্ঠানত অংশগ্ৰণ কৰে নগাঁও লোকসভা সমষ্টিৰ সাংসদ প্ৰদ্যুৎ বৰদলৈয়ে ৷ অনুষ্ঠানত অংশগ্ৰহণ কৰি সাংসদ গৰাকীয়ে সংবাদ মাধ্যমৰ আগত উল্লেখ কৰে যে, কেৱল কংগ্ৰেছ আৰু এ আই ইউ ডি এফৰ মাজতে সীমাবদ্ধ নাথাকে কংগ্ৰেছৰ মহা মিত্ৰজোট ৷ কংগ্ৰেছৰ লগত থাকিব সকলো বিজেপি বিৰোধী দল ৷ ইয়াৰ বাবে তেওঁলোকে ইতিমধ্যে সদৌ অসম ছাত্ৰ সন্থাকো আহ্বান জনাইছে বুলি উল্লেখ কৰে সাংসদ গৰাকীয়ে ৷
আনহাতে সংবাদ মাধ্যমযোগে সাংসদ গৰাকীয়ে ক্ষুৰধাৰ সমালোচনা কৰে মন্ত্ৰী হিমন্ত বিশ্ব শৰ্মাক ৷ মন্ত্ৰী হিমন্ত বিশ্ব শৰ্মাক নাইপিয়াৰ দৰে বৰণ সলনি কৰে বুলি কোৱাৰ লগতে তেওঁ চেঙেলী মাছৰ দৰে নিজৰ স্বাৰ্থৰ লোভত ৰাজনীতি কৰে বুলি মন্তব্য কৰে ৷ ৰাজনীতিৰ উৰ্ধত তেওঁ একোৱেই চিন্তা নকৰে, ই অতিকৈ ঘৃণনীয় বুলিও মন্তব্য কৰে প্ৰদ্যুৎ বৰদলৈয়ে ৷
