হায়দৰাবাদ : হিন্দুৰ হোলী উৎসৱক লৈ অপমানজনক মন্তব্য কৰাৰ অভিযোগত বলীউডৰ চলচ্চিত্ৰ নিৰ্মাতা আৰু নৃত্য পৰিচালক ফাৰাহ খানৰ বিৰুদ্ধে অপৰাধমূলক গোচৰ তৰা হৈছে । ছ'চিয়েল মিডিয়াৰ প্ৰভাৱশালী ব্যক্তি বিকাশ ফাটকে, যাক হিন্দুস্তানী ভাও বুলি জনা যায়, তেওঁ তেওঁৰ অধিবক্তা আলী কাছিফ খান দেশমুখৰ জৰিয়তে মুম্বাইৰ খাৰ আৰক্ষী থানাত এই অভিযোগ দাখিল কৰে ।
অভিযোগত কোৱা হৈছে যে ফাৰাহ খানে হোলী উদযাপনক ছাপৰিৰ কাৰ্যকলাপ বুলি অভিহিত কৰিছে ৷ ছাপৰি অৰ্থাৎ যি সংস্কৃতিৱান ব্যক্তি নহয়, বেছিভাগেই এই শব্দটো অপমানজনক প্ৰেক্ষাপটত ব্যৱহাৰ কৰা হয় । বিকাশ ফাটকেই কয় যে এই মন্তব্য নিশ্চয় অপমানজনক আৰু হিন্দুসকলৰ ধৰ্মীয় অনুভূতিত আঘাত দিয়াৰ প্ৰয়াস ।
অধিবক্তা আলী কাছিফ খান দেশমুখে এনে বক্তব্যৰ বিৰুদ্ধে ব্যৱস্থা গ্ৰহণৰ প্ৰয়োজনীয়তাৰ ওপৰত আলোকপাত কৰে । তেওঁ কয়, “মোৰ ক্লায়েণ্টে আৰম্ভণিৰে পৰাই ধৰ্মৰ বিৰুদ্ধে ঘৃণা আৰু অপমানজনক মন্তব্য বিয়পোৱা সকলো ব্যক্তি আৰু সত্তাৰ বিৰুদ্ধে মাত মাতি আহিছে । বলীউড উদ্যোগত উচ্চ মৰ্যাদা থকা বুলি দাবী কৰা লোকসকলৰ কথাৰ ওপৰত কোনো নিয়ন্ত্ৰণ নথকাটো অতি লজ্জাজনক ।”
অভিযোগটোত ভাৰতীয় ন্যায় সংহিতা (বি এন এছ), 2023-ৰ বিভিন্ন ধাৰাৰ অধীনত ফাৰাহ খানৰ বিৰুদ্ধে এফ আই আৰ দাখিল কৰাৰ দাবী কৰা হৈছে । অভিযোগটোত এইবুলিও যুক্তি দিয়া হৈছে যে ফাৰাহ খানে আপত্তিজনক মন্তব্য কৰি ভাৰতীয় সংবিধানৰ 19 নং অনুচ্ছেদৰ অধীনত বাক স্বাধীনতাৰ সাংবিধানিক অধিকাৰৰ অপব্যৱহাৰ কৰিছে ।
অভিযোগ দাখিল হোৱাৰ পাছতো খাৰ আৰক্ষীয়ে এই বিষয়ত এতিয়াও এফ আই আৰ ৰুজু কৰা নাই । এগৰাকী আৰক্ষী বিষয়াই তদন্ত চলি থকা বুলি নিশ্চিত কৰে যদিও সবিশেষ জনোৱাৰ পৰা বিৰত থাকে ।
এই বিতৰ্ক তেতিয়া আৰম্ভ হয় যেতিয়া বৃহস্পতিবাৰে টেলিভিছনৰ এটা অনুষ্ঠানত ফাৰাহ খানে এই মন্তব্য কৰে । এই বক্তব্যক ব্যাপক সমালোচনা কৰাৰ লগতে বহুতে তেওঁৰ বিৰুদ্ধে হিন্দু ৰীতি-নীতিক অপমান কৰাৰ অভিযোগ উত্থাপন কৰে । সামাজিক বিষয়ত স্পষ্টবাদী স্থিতিৰ বাবে পৰিচিত হিন্দুস্তানী ভাওৱে ফাৰাহ খানৰ বিৰুদ্ধে শীঘ্ৰে আইনী ব্যৱস্থা গ্ৰহণ কৰিবলৈ কৰ্তৃপক্ষক আহ্বান জনাইছে ।
লগতে পঢ়ক : কেবাখনো পাৰিবাৰিক ছবি উপহাৰ দিয়া এইজন পৰিচালকে বলীউডৰ ‘প্ৰেম’ সজাব আয়ুষ্মান খুৰানাক
