হোজাই, 10 ছেপ্তেম্বৰ: হোজাই জিলাৰ কাকীত বিধ্বংসী অগ্নিকাণ্ডৰ ঘটনা সংঘটিত হৈছে ৷ কাকী আৰক্ষী থানাৰ সমীপৰ এক নং কাকী চাৰিআলিত সংঘটিত হয় এই অগ্নিকাণ্ডৰ ঘটনা । অৰুন বৰাৰ হাৰ্ডওৱেৰ দোকানৰ পৰাই গেছ চিলিণ্ডাৰ বিস্ফোৰণ হৈ অগ্নিকাণ্ডৰ সুত্ৰপাত হয় বুলি জানিব পৰা গৈছে ।
তথ্য অনুসৰি, পুৱতি নিশা প্ৰায় 2 বজাত সংঘটিত হয় এই অগ্নিকাণ্ডৰ ঘটনা ৷ প্ৰথমে হাৰ্ডওৱেৰ দোকানত জুইৰ সূত্ৰপাত ঘটি পৰৱৰ্তী সময়ত আন দহখন দোকানলৈ জুই সম্প্ৰসাৰিত হয় ৷ তিনিখন অগ্নিনিৰ্বাপক বাহিনীৰ সহযোগত জুই নিৰ্বাপন কৰিবলৈ সক্ষম হয় ৷
আনহাতে,স্বত্বাধিকাৰী অৰুন বৰাৰ হাৰ্ডওৱেৰ দোকানখনৰ বিৰুদ্ধে পূৰ্বৰ পৰাই অবৈধ পেট্ৰল,ডিজেল মজুত ৰখাৰ অভিযোগ স্থানীয় ৰাইজৰ ৷ বুধবাৰৰ নিশাও অবৈধভাবে বিক্ৰীৰ বাবে মজুত ৰখা চিলিণ্ডাৰৰ পৰাই বিস্ফোৰণ ঘটি জুইৰ সূত্ৰপাত হোৱা বুলি জানিব পৰা গৈছে ৷
উল্লেখ্য যে,অগ্নিকাণ্ডৰ ফলত প্ৰায় 70 লাখ টকাৰ সম্পত্তি জুইত জাহ গৈছে বুলি ভুক্তভোগীয়ে জানিবলৈ দিয়ে ৷
লগতে পঢ়ক : অনুষ্ঠিত নহ’ল জামুগুৰিহাটৰ ২৬৫ বছৰীয়া বোকাখেচা ভাওনা
