হোজাই,২৭ মাৰ্চ: শুকুৰবাৰে লামডিঙত শিবু মিশ্ৰৰ হৈ নিৰ্বাচনী প্ৰচাৰ চলালে মন্ত্ৰী ডঃ হিমন্ত বিশ্ব শৰ্মাই । শ্বহীদ মৈদামত অনুষ্ঠিত এই নিৰ্বাচনী সভাত ২০ হাজাৰৰো অধিক লোকৰ সমাগম হয় । কংগ্ৰেছৰ লগতে এআইইউডিএফ-ৰ সভাপতি বদৰুদ্দিন আজমলক তুলাধূনা দিয়ে মন্ত্ৰী ডঃ শৰ্মাই ।
তেওঁ কয় যে, কংগ্ৰেছে সূতা, কম্বল, লুঙীৰ ৰাজনীতি কৰে ৷ কংগ্ৰেছৰ নাম ক'লে গেলামালৰ দোকানৰ পৰাও দোকানীয়ে বস্তু নিদিয়ে বুলি তেওঁ কটাক্ষ কৰে । চাকৰি প্ৰদানক লৈও কংগ্ৰেছক ক্ষুৰধাৰ সমালোচনা কৰে মন্ত্ৰী গৰাকীয়ে । তেওঁ কয় যে, কংগ্ৰেছত এইবাৰ গেৰাণ্টি গান্ধী আহিল ৷ যি বস্তুৰ গেৰাণ্টি থাকে সেই বস্তু বেছি দিন নচলে ৷ স্বপন ক'ৰে নিজৰ জাতিকে বিক্ৰী কৰিলে সেয়েহে এইবাৰ স্বপন ক'ৰক ইয়াৰ পৰা একেবাৰে বিদায় দিব লাগিব বুলিও শৰ্মাই মন্তব্য কৰে ৷
আনহাতে, বদৰুদ্দিন আজমলক সমালোচনা কৰি মন্ত্ৰী হিমন্তই কয় যে, শাসনলৈ অহাৰ পূৰ্বেই আজমলে নতুন আঁচনি গ্ৰহণ কৰিছে আৰু সেয়া হৈছে মুছলমান সম্প্ৰদায়ৰ মহিলাক যিমান ইচ্ছা সিমান সন্তান জন্ম দিয়াৰ অনুমতি দিয়াৰ । লগতে সন্তান জন্ম দিয়া মহিলাৰ কষ্টৰ কথা উল্লেখ কৰি তেওঁ প্ৰশ্ন কৰে যে, মহিলাসকল সন্তান জন্ম দিয়া মেচিন নেকি । আজমলে চৰকাৰ গঠন হ'লে মাদ্ৰাছা খুলিব বুলি কোৱা প্ৰসংগত তেওঁ আজমলক প্ৰত্যাহ্বান জনাই কয় যে, যদি আজমলৰ ভৰিত ইমান জোৰ আছে তেন্তে চিকিৎসালয় স্থাপন কৰি দেখুওৱাক ।
বিজেপিয়ে গ্ৰহণ কৰা আঁচনিসমূহৰ বিষয়ে বৰ্ণনা কৰি তেওঁ কয় যে, বিজেপিয়ে অৰুণোদয়, স্বয়ং আঁচনি গ্ৰহণ কৰাৰ লগতে বিনামূলীয়া চাউল প্ৰদান কৰিছে । ছাত্ৰীসকলকো স্কুটী প্ৰদান কৰা হৈছে । বিজেপি চৰকাৰ পুনৰ শাসনলৈ আহিলে প্ৰতি বছৰে এক লাখ নিবনুৱাক চাকৰি প্ৰদান কৰিব বুলিও মন্ত্ৰীগৰাকীয়ে প্ৰতিশ্ৰুতি দিয়ে ৷
লগতে ল'ৰাবোৰকো বাইক দিব বুলি আশ্বাস দিয়ে । কিন্তু ধেমালিৰ সুৰত তেওঁ কয় যে, বাইকৰ ৰং গেৰুৱা হ'ব লাগিব । মহাবিদ্যালয়ত পাঠগ্ৰহণ কৰিলে প্ৰতিদিনে ছাত্ৰ-ছাত্ৰীয়ে ১০০ টকাকৈ লাভ কৰিব । লগতে এইবাৰ অসমত বিহু উলহ-মালহেৰে উদযাপন কৰা হ'ব বুলিও তেওঁ মন্তব্য কৰে ।
