হোজাই,২৩ ডিচেম্বৰ : বৃহস্পতিবাৰে ঘোষণা হয় সাহিত্য অকাডেমি বঁটা ২০২২ (Sahitya Akademi Award 2022) ৷ ৰাজ্যৰ মুঠ ৪ গৰাকী বিশিষ্ট লেখক, সাহিত্যিক তথা কবিলৈ আগবঢ়োৱা হৈছে সাহিত্য অকাডেমি ২০২২ বঁটা ৷ ২০০৭ চনত সাহিত্য অকাডেমিৰ অনুবাদ বঁটা লাভ কৰা কে বি নেপালীয়ে এইবাৰ পালে নেপালী ভাষাৰ সাহিত্য অকাডেমি বঁটা (K B Nepali gets Sahitya Akademi Award)। চাইন' নামৰ নেপালী ভাষাত লিখা নাটকখনৰ বাবে চলিত বৰ্ষৰ সাহিত্য অকাডেমি বঁটা লাভ কৰিছে নেপালী সাহিত্যৰ বিশিষ্ট সাহিত্যক কে বি নেপালীয়ে (খৰ্গ বাহাদুৰ নেপালী) (Sahitya Akademi Award 2022 in Nepali language)।
১৯৩৯ চনৰ ১৬ নৱেম্বৰত ডিগবৈৰ মূলিয়াবৰীত জন্মগ্ৰহণ কৰা বিশিষ্ট সাহিত্যিকগৰাকী সম্প্ৰতি হোজাই জিলাৰ লামডিঙৰ স্থায়ী বাসিন্দা । লামডিং নগৰৰ মধ্যস্থলতে তেওঁৰ 'বিন্দু' নামৰ এটা ছপাশাল আছে । ১৯৭২ চনত এই ছপাশালটো তেওঁ স্থাপন কৰিছিল । ১৯৬১ চনত প্ৰকাশ পোৱা 'বিন্দু' নামৰ এখন ত্ৰিমাসিক আলোচনীৰ তেওঁ সম্পাদক আছিল । এই আলোচনীখনৰ নামেৰে তেওঁ ছপাশালটো নামাকৰণ কৰিছে ।
কে বি নেপালীয়ে ২০০৭ চনটো সাহিত্য অকাডেমি অনুবাদ বঁটা লাভ কৰিছিল (Nepali writer K B Nepali)। মহাকবি কালিদাসৰ অমৰ কাব্য 'মেঘদূত' নেপালী ভাষালৈ অনুবাদৰ বাবে সেই বৰ্ষত তেওঁ এই বঁটা লাভ কৰিছিল ।
বিশিষ্ট সাহিত্যিকগৰাকীয়ে ১৯৬০ চনত কবিতা পুথি 'নৱ অশ্ৰু', ১৯৬৪ চনত কবিতা 'বিৰহী', ১৯৬৫ চনত উপন্যাস 'মেৰ' ঘৰ মেৰ' সংসাৰ', ১৯৬৫ চনত উপন্যাস 'সমৰ্পন', ১৯৭৩ চনত উপন্যাস 'তচবীৰ এক ৰাত কো', ১৯৭০ চনত গল্প সংগ্ৰহ ''কল্পনা', ১৯৮৪ চনত কবিতা পুথি 'প্লেটফৰ্ম', ১৯৯১ চনত গল্প সংগ্ৰহ 'ভোক মৃত্যু আৰু সংঘৰ্ষ', ১৯৮৬ চনত গীতৰ সংগ্ৰহ 'অনুৰাগ', ১৯৯২ চনত অসমীয়া চুটি গল্প 'হত্যাকাৰী', ২০০১ চনত কবিতা সংকলন 'অনিয়ন্ত্ৰিত মন', ২০০৪ চনত কালিদাসৰ 'মেঘদূত' কাব্যৰ অনুবাদ আদি গ্ৰন্থৰে নেপালী সাহিত্যৰ ভড়াল চহকী কৰিছে ।
সাহিত্য অকাডেমি বঁটাৰ উপৰিও তেওঁ অখিল ভাৰতীয় নেপালী ভাষা সংঘৰ দ্বাৰা সাহিত্য ৰচনা পুৰস্কাৰ লাভ কৰিছিল । তদুপৰি তেওঁৰ সমৰ্পন নামৰ উপন্যাসখন বহিঃৰাষ্ট্ৰটো সন্মানিত হৈছে । নেপালৰ কাঠমাণ্ডুস্থিত আন্তঃৰাষ্ট্ৰীয় নেপালী ভাষা সংস্থাইও সন্মানিত কৰিছিল । দাৰ্জিলিঙৰ নেপালী সাহিত্য সন্মিলন, অসম সাহিত্য সভা আদি সংগঠনেও বিশিষ্ট সাহিত্যিকগৰাকীক সন্মানিত কৰিছে ।
তেওঁ ২০০৫ চনত নেপালৰ পৰা মদন স্মাৰক বঁটা লাভ কৰিছিল । অসম নেপালী সাহিত্য পৰিষদ গুৱাহাটীয়েও তেওঁক সন্মানিত কৰিছে । চলিত বৰ্ষত সাহিত্য অকাডেমি বঁটা লাভ কৰা নাটক 'চাইন' ২০১৮ চনত প্ৰকাশ পাইছিল ।
উল্লেখ্য যে, দুটা দিনৰ পূৰ্বে বিশিষ্ট সাহিত্যিকগৰাকীৰ কন্যাৰ পৰলোক প্ৰাপ্তি ঘটিছে । সাহিত্য অকাডেমি বঁটাৰ প্ৰাপ্তিয়ে সেয়ে দুখৰ মাজতো কিছু সুখ কঢ়িয়াই আনিছে বুলি মন্তব্য কৰে । বিশিষ্ট সাহিত্যিকগৰাকীৰ পত্নীও দীৰ্ঘদিন ধৰি শয্যাশায়ী হৈ আছে । তেওঁ কয় যে, এইয়া দীৰ্ঘদিন ধৰি নেপালী সাহিত্যলৈ আগবঢ়োৱা অৱদানৰ স্বীকৃতি । ইয়াৰ বাবে তেওঁ কৃতজ্ঞ ।
