নতুন দিল্লী : অহা ১৮ ফেব্ৰুৱাৰীত অৰ্থাৎ মঙলবাৰে অৱসৰ গ্ৰহণ কৰিব দেশৰ মুখ্য নিৰ্বাচন আয়ুক্ত ৰাজীৱ কুমাৰে । তাৰ পূৰ্বে নতুন মুখ্য নিৰ্বাচন আয়ুক্ত নিৰ্বাচনৰ বাবে সোমবাৰে প্ৰধানমন্ত্ৰী নৰেন্দ্ৰ মোদীৰ নেতৃত্বত অনুষ্ঠিত হ'বলগীয়া তিনিজনীয়া পেনেলৰ গুৰুত্বপূৰ্ণ বৈঠকৰ ওপৰত এতিয়া সকলোৰে দৃষ্টি নিবদ্ধ আছে । এই পেনেলত আছে লোকসভাৰ বিৰোধী দলৰ নেতা ৰাহুল গান্ধী আৰু কেন্দ্ৰীয় গৃহ মন্ত্ৰী অমিত শ্বাহ । তেওঁলোকে মুখ্য নিৰ্বাচন আয়ুক্ত বাছনি প্ৰক্ৰিয়াত প্ৰধানমন্ত্ৰীৰ সৈতে বৈঠকত বহিব ।
মুখ্য নিৰ্বাচন আয়ুক্ত বাছনি প্ৰক্ৰিয়া কি
উল্লেখ্য যে নতুন আইনৰ অধীনত এইবাৰ প্ৰথমবাৰৰ বাবে মুখ্য নিৰ্বাচন আয়ুক্ত বাছনি কৰিবলৈ ওলোৱা হৈছে । 2023 চনৰ ডিচেম্বৰত মুখ্য নিৰ্বাচন আয়ুক্ত আৰু অন্যান্য নিৰ্বাচন আয়ুক্ত (নিযুক্তি, সেৱাৰ চৰ্তাৱলী আৰু কাৰ্যকাল) আইন, 2023 কাৰ্যকৰী হৈছিল । এই ব্যৱস্থাৰ অধীনত প্ৰথমবাৰৰ বাবে সুখবীৰ সিং সান্ধু আৰু জ্ঞানেশ কুমাৰক ২০২৪ চনৰ মাৰ্চ মাহত নিৰ্বাচন আয়ুক্ত হিচাপে নিযুক্তি দিয়া হৈছিল ।
মুখ্য নিৰ্বাচন আয়ুক্ত নিযুক্তিৰ ক্ষেত্ৰত নতুন আইনখনে পূৰ্বৰ জ্যেষ্ঠতম নিৰ্বাচন আয়ুক্তক উন্নীত কৰাৰ যি ব্যৱস্থা আছিল সেয়া সলনি কৰিছে । ইয়াৰ পৰিৱৰ্তে বৰ্তমান নিৰ্বাচন পেনেলে সংখ্যাগৰিষ্ঠ ভোটৰ ওপৰত ভিত্তি কৰি বা সৰ্বসন্মতভাৱে ইয়াৰ সিদ্ধান্ত লয় । অনুসন্ধান সমিতিৰ দ্বাৰা তালিকাভুক্ত কৰা প্ৰাৰ্থীসকলৰ মাজৰ পৰা তেওঁৰ নাম চূড়ান্ত কৰা হয় ।
সূত্ৰ অনুসৰি, ৰাজীৱ কুমাৰৰ পিছত জ্ঞানেশ কুমাৰ হৈছে বৰ্তমান জ্যেষ্ঠতম নিৰ্বাচন আয়ুক্ত । তেওঁৰ কাৰ্যকাল ২০২৯ চনৰ ২৬ জানুৱাৰীত অন্ত পৰিব । অৱশ্যে সোমবাৰৰ বৈঠকত বাছনি সমিতিয়ে বৰ্তমানৰ এজন নিৰ্বাচন আয়ুক্তক উন্নীত কৰে নে নিৰ্বাচন আয়ুক্তৰ বৰ্তমানৰ ৰোষ্টাৰৰ বাহিৰৰ পৰা নতুন মুখ্য নিৰ্বাচন আয়ুক্ত নিয়োগ কৰে সেইটো লক্ষণীয় হ'ব ।
যদি পেনেলে দ্বিতীয় বিকল্পটো বাছনি কৰে তেন্তে নতুন মুখ্য নিৰ্বাচন আয়ুক্তই ২০২৯ চনৰ লোকসভা নিৰ্বাচনত তদাৰক কৰিব । ইয়াৰ লগতে এই বছৰ অনুষ্ঠিত হ'বলগা বিহাৰৰ বিধানসভা নিৰ্বাচন, ২০২৬ চনৰ অসম, কেৰালা, তামিলনাডু, পশ্চিমবংগ আৰু পুডুচেৰী নিৰ্বাচন আৰু ২০২৭ চনৰ গোৱা, মণিপুৰ, পঞ্জাব, উত্তৰ প্ৰদেশ, গুজৰাট আৰু হিমাচল প্ৰদেশৰ নিৰ্বাচন তেওঁৰ নেতৃত্বত অনুষ্ঠিত হ'ব ।
সংশোধিত আইন অনুসৰি, মুখ্য নিৰ্বাচন আয়ুক্ত আৰু অন্যান্য নিৰ্বাচন আয়ুক্তসকল হয় ভাৰত চৰকাৰৰ সচিব পদৰ মৰ্যাদাৰ সমান পদত অধিষ্ঠিত থাকিব লাগিব, নহ'লে ব্যৱস্থাপনা আৰু সততাৰে নিৰ্বাচন পৰিচালনাৰ জ্ঞান আৰু অভিজ্ঞতা থকা এগৰাকী ব্যক্তি হোৱাটো বাঞ্ছনীয় । ইয়াৰ অৰ্থ হৈছে বৰ্তমান সেৱা আগবঢ়াই থকা আৰু অৱসৰপ্ৰাপ্ত সচিব পৰ্যায়ৰ বিষয়াসকল মুখ্য নিৰ্বাচন আয়ুক্ত আৰু নিৰ্বাচন আয়ুক্ত হিচাপে বিবেচনাযোগ্য ।
উল্লেখ্য যে বৰ্তমানৰ মুখ্য নিৰ্বাচন আয়ুক্ত ৰাজীৱ কুমাৰে ৬৫ বছৰ বয়সত অহা ১৮ ফেব্ৰুৱাৰীত (মঙলবাৰে) অৱসৰ গ্ৰহণ কৰিব ।
