হোজাই,27 জুলাই : অসমত ধাৰাবাহিকভাৱে সংঘটিত হৈছে গুলীচালনাৰ ঘটনা (Firing Incident) ৷ বিশেষকৈ বিগত কেইবাদিনত ড্ৰাগছ সৰবৰাহকাৰী (Drug Mafia)ৰে আৰক্ষীৰ ধাৰাবাহিকভাৱে সংঘৰ্ষ হৈ আছে ৷ এনে সময়তে মঙলবাৰে পুনৰ সংঘটিত হৈছে গুলীচালনাৰ ঘটনা ৷
এইবাৰ গুলীচালনা (Firing Incident)ৰ ঘটনা সংঘটিত হৈছে হোজাইৰ যমুনামুখত ৷ মঙলবাৰে পুৱতি নিশা যমুনামুখত আৰক্ষীয়ে এটা ATM চোৰক গুলিওৱাৰ ঘটনা সংঘটিত হৈছে ৷ যমুনামুখ আৰক্ষীৰ গুলীত গুৰুত্বৰভাৱে আহত হৈছে ATM চোৰটো ৷
লগতে পঢ়ক: পুনৰ অশান্ত হৈ পৰিছে অসম-মিজোৰাম সীমান্ত
জানিব পৰা মতে, ATM চোৰটোৰ নাম দিলোৱাৰ হুছেইন ৷
প্ৰাপ্ত তথ্য অনুসৰি, আৰক্ষীৰ গুলীত আহত দিলোৱাৰ হুছেইন নামৰ ATM চোৰটো বহুকেইটা চুৰি ঘটনাৰ লগত জড়িত হৈ আছে ৷ ATM চুৰি সংক্ৰান্তত জড়িত থকা দেওবাৰে লংকা উদালি পৰা যমুনামুখ আৰক্ষীয়ে গ্ৰেপ্তাৰ কৰিছিল দিলোৱাৰ হুছেইনক । আজি অৰ্থাৎ মঙলবাৰে পুৱতি নিশা আৰক্ষীয়ে দিলোৱাৰ হুছেইনক লগত লৈ তদন্তৰ বাবে লৈ যোৱা হৈছিল যমুনামুখ আৰু কামপুৰ সংযোগী চাংজোৰায় পথলৈ ৷
কিন্তু তেনে সময়তে ঘটে অথন্তৰ ৷ যমুনামুখ আৰু কামপুৰ সংযোগী চাংজোৰায় পথচোৱাত আৰক্ষীৰ চকুত ধূলি দি পলাবলৈ চেষ্টা কৰে দিলোৱাৰ হুছেইনে ৷ এনে সময়তে উপায়ন্তৰ হৈ দিলোৱাৰ হুছেইনক গুলীয়াবলৈ বাধ্য হয় যমুনামুখ আৰক্ষীয়ে ৷
জানিব পৰা মতে, দিলোৱাৰ হুছেইনৰ দুয়োটা ভৰিতে গুলী লাগে ৷ আৰক্ষীৰ গুলীত গুৰুত্বৰ ভাৱে আহত দিলোৱাৰ হুছেইনক ইতিমধ্যে ভৰ্তি কৰোৱা হৈছে নগাঁও অসামৰিক চিকিৎসালয়ত ৷ এই সম্পৰ্কে আৰক্ষীয়ে তদন্ত চলাই আছে যদিও তদন্তৰ খাতিৰত বৰ্তমানলৈকে সাংবাদিকৰ আগত মুখ খোলা নাই আৰক্ষীয়ে ৷
লগতে পঢ়ক: চলন্ত বাহনলৈ গুলীচালনাৰ প্ৰসংগ: আটক কুখ্যাত ড্ৰাগছ মাফিয়া
