হোজাই, 2 এপ্ৰিলঃ ফেচবুকেই যেন অৱশেষত কাল হ'ল এগৰাকী যুৱতীৰ বাবে | ঘটনা সন্দৰ্ভত জানিব পৰা মতে লংকাৰ খাৰিখানাৰ শ্বাহিন আহমেদ নামৰ যুৱক এজনে ফেচবুকৰ জৰিয়তে প্ৰায় ১ বছৰ পূৰ্বে চিনাকী হৈছিল এগৰাকী যুৱতীৰ সৈতে | প্ৰথমে বন্ধুত্ব তাৰ পিচতে বন্ধুত্ব পৰিণত হ'ল প্ৰেমলৈ | কিন্তু ২৮ মাৰ্চত প্ৰেমিকাক অপহৰণ কৰাৰ অভিযোগ উঠিছে প্ৰেমিকৰ ওপৰত | প্ৰেমিকাক লগ কৰাৰ কৌশলৰে সন্ধিয়া ঘৰৰ পদূলিলৈ মাতি কৌশলৰে ঘৰৰ সন্মুখৰৰ পৰা দুই সহযোগী যুৱকৰ সৈতে প্ৰেমিকাক অপহৰণ কৰি নিছিল প্ৰেমিক শ্বাহিন আহমেদে ৷
আনহাতে যুৱতী গৰাকীক অপহৰণ কৰি নি সেই নিশাই ডিমাপুৰত দুষ্ট চক্ৰৰ হাতত বিক্ৰী কৰিছিল শ্বাহিন আহমেদসহ আন দুই যুৱকে | পৰিয়ালৰ লোকে বিশেষ সূত্ৰে খবৰ লাভ কৰি অৱশেষত সোমবাৰে নিশা যুৱতী গৰাকীক ডিমাপুৰৰ পৰা উদ্ধাৰ কৰিবলৈ সক্ষম হয় | ইতিমধ্যে, অপহৃত যুৱতীগৰাকীক উদ্ধাৰ কৰাৰ পিচতেই মঙলবাৰে উদালী আৰক্ষী থানাত শ্বাহিন আহমেদসহ আন দুই যুৱকৰ বিৰুদ্ধে গোচৰ ৰুজু কৰে অপহৃত যুৱতী গৰাকীৰ পৰিয়ালে |
আৰক্ষীয়ে ইতিমধ্যে এই গোচৰৰ ভিত্তিত তিনি যুৱকৰ সন্ধানত অভিযান অব্যাহত ৰাখিছে | প্ৰেমত প্ৰতাৰণাৰে এনেদৰে এগৰাকী যুৱতীক অপহৰণ কৰি দুষ্ট চক্ৰৰ কৱলত বিক্ৰী কৰা ঘটনাই তীব্ৰ চাঞ্চল্যৰ সৃষ্টি কৰিছে জিলাখনত৷
