হোজাই, 22 জুলাই : হোজাই জিলা আৰক্ষী (Hojai Distric Police)ৰ তৎপৰতাত বুধবাৰে নিশা কেৰালাৰ নাৰী ব্যৱসায়ী চক্ৰ (Human trafficking)ৰ পৰা ৯ গৰাকী যুৱতী উদ্ধাৰ কৰা হয় ৷ বহিঃৰাজ্যত নাৰীদেহ ব্যৱসায়ী চক্ৰৰ হাতত বিক্ৰী হোৱা ৯ গৰাকী যুৱতীক লৈ বুধবাৰে নিশা প্ৰায় 8 বজাত দুই সৰবৰাহকাৰী লংকাত উপস্থিত হয় । হোজাই জিলা আৰক্ষী অধীক্ষকৰ নিৰ্দেশত শংকৰদেৱ নগৰ আৰক্ষী চকীৰ ভাৰপ্ৰাপ্ত বিষয়া মুজিবুৰ ৰহমানৰ নেতৃত্বত আৰক্ষী এটা দলে কেৰালা আৰক্ষীৰ সহযোগত অভিযান চলাই যুৱতীকেইগৰাকীক উদ্ধাৰ কৰে । আৰক্ষীৰ দলটোৱে সৰবৰাহকাৰী দুটাকো আটক কৰে ৷
আৰক্ষীৰ দলটোৱে আটক কৰা সৰবৰাহকাৰী দুটা ক্ৰমে মফিজুল হক আৰু ৰকিবুল হক বুলি জানিব পৰা হৈছে ৷ মুজিবুৰ ৰহমানৰ নেতৃত্বত যোৱা আৰক্ষীৰ দলটোৱে দুই সৰবৰাহকাৰীক আটক কৰি লংকা থানালৈ লৈ আনে । আৰক্ষীৰ সূত্ৰৰ পৰা জানিব পৰা মতে, মফিজুল হক আৰু ৰকিবুল হকে হোজাই জিলাৰ লগতে আন ঠাইৰ পৰা যুৱতীকেইগৰাকীক চাকৰি, ব্যৱসায় আদিৰ প্ৰলোভনেৰে কেৰালালৈ লৈ গৈছিল ।
লংকা আৰক্ষীয়ে সম্প্ৰতি দুই সৰবৰাহকাৰীক জেৰা অব্যাহত ৰাখিছে ৷ আনহাতে কেৰেলাৰ পৰা উদ্ধাৰ কৰা যুৱতীকেইগৰাকীক বৰ্তমান ডবকা মহিলা আশ্ৰয় গৃহত (Doboka Women Shelter Home) ত ৰখা হৈছে ।
আনহাতে, একেদিনাই ৰঙিয়া ৰে’ল ষ্টেচনত (RANGIA RAILWAY STATIONS) তহলদাৰী ৰেলৱে আৰক্ষী (RPF)য়ে মানৱ সৰবৰাহকাৰীৰ কবলৰ পৰা 4 গৰাকী কিশোৰী আৰু 2 টা কিশোৰসহ মুঠ ১৫ গৰাকীক উদ্ধাৰ কৰিবলৈ সক্ষম হয় । তহলদাৰী ৰেলৱে আৰক্ষী (RPF) দলে এগৰাকী মহিলা সৰবৰাহকাৰীকো আটক কৰে ৷ আটক হোৱা মহিলাগৰাকীৰ চাবিনা নায়ক বুলি জানিব পৰা গৈছে ।
উদ্ধাৰ হোৱা আটাইকেইগৰাকীৰ ঘৰ শোণিতপুৰ জিলাৰ অন্তৰ্গত বিন্দুগুৰীত বুলি উল্লেখ কৰিছে আৰক্ষীয়ে । সৰবৰাহকাৰী মহিলাগৰাকীয়ে মুম্বাইৰ মাছৰ কোম্পানী এটাত কাম কৰাৰ প্ৰলোভনেৰে নিবলৈ ওলোৱা মূহুৰ্তত তহলদাৰী ৰেলৱে আৰক্ষীৰ দলে অভিযান চলাই আটাইকেইজনক উদ্ধাৰ কৰে । তাৰ পাচতে সৰবৰাহকাৰীসহ উদ্ধাৰ কৰা আটাইকেইজনক তহলদাৰী ৰেলৱে আৰক্ষীৰ দলে থানাত চমজাই দিয়ে ।
লগতে পঢ়ক : ভাৰত ভূটান সীমান্তত সংঘটিত হ’ল মানৱ সৰবৰাহৰ ঘটনা
