হাইলাকান্দি,16এপ্ৰিলঃ ৰাজ্যত লক ডাউন অব্যাহত থকাৰ সময়তে হাইলাকান্দিত সংঘটিত হৈছে এক বৃহৎ কেলেংকাৰী ৷ জিলাখনৰ মোহনপুৰ সমবায় সমিতিত সংঘটিত হৈছে এই কেলেংকাৰী ৷ খাদ্য সুৰক্ষা আঁচনিৰ জৰিয়তে দৰিদ্ৰ লোকৰ বাবে চৰকাৰে মোকলাই দিয়া 40লাখ টকাৰ চাউল আত্মসাৎ কৰাৰ অভিযোগ উঠিছে হাইলাকান্দি জিলাৰ অগপ সভাপতি আফতাব উদ্দিন লস্কৰৰ বিৰুদ্ধে ৷ ইপিনে এই কেলেংকাৰীৰ সন্দৰ্ভত জিলা প্ৰশাসনে সমবায় সমিতিৰ সচিব তথা হাইলাকান্দি জিলা অগপ সভাপতি আফতাব উদ্দিন লস্কৰক মূল অভিযুক্ত হিচাপে আলগাপুৰ থানাত ৰজু কৰিছিল গোচৰ ৷ যাৰ পৰিপ্ৰেক্ষিতত আলগাপুৰ আৰক্ষীয়ে ঘটনাৰ তদন্ত কৰি বুধবাৰে নিশা হাইলাকান্দিৰ মোহনপুৰ অঞ্চলৰ 'বেৰা খালৰপাৰ নিম্ন প্ৰাথমিক বিদ্যালয়'ৰ এটা বন্ধ কোঠাৰ পৰা উদ্ধাৰ কৰে প্ৰায় 45 বেগ চাউল আৰু 5 বেগ আটা ৷ আনহাতে আজি পুনৰ এই ঘটনাৰ তদন্ত চলাই আলগাপুৰ আৰক্ষীয়ে গ্ৰেপ্তাৰ কৰে ছামচিৰ উদ্দিন শেখ নামৰ এজন লোকক ৷
উল্লেখযোগ্য যে, এই কেলেংকাৰীৰ সৈতে জড়িত থকাৰ অভিযোগত আলগাপুৰ আৰক্ষীয়ে বুধবাৰে নিশাই গ্ৰেপ্তাৰ কৰিছিল মোহনপুৰ সমবায় সমিতিৰ দুই সদস্য ময়নুল হক বড়ভূঞাৰ লগতে নিজাম উদ্দিন লস্কৰ নামৰ আন দুজন লোকক ৷
লগতে পঢ়কঃ উজনিৰ 10 খন জিলাৰ আইন শৃংখলাজনিত পৰ্যালোচনা মুখ্যমন্ত্ৰীৰ
