হাইলাকান্দি, 22 জুনঃ তদন্ত চলি থকা অৱস্থাতে আন স্থানলৈ বদলি কৰা হ'ল সংখ্যালঘু ছাত্ৰ বৃত্তি কেলেংকাৰীৰ মূল অভিযুক্ত শিক্ষা বিষয়া ৰাজীৱ কুমাৰ ঝাক ৷ যাক লৈ এতিয়া ক্ষুভ প্ৰকাশ কৰিছে ভিন্ন দল-সংগঠনৰ সদস্য সকলে ৷ অভিযোগ অনুসৰি, এই ছাত্ৰ বৃত্তিৰ নামত অভিযুক্ত লোকজনে সংঘটিত কৰিছে প্ৰায় ২০ কোটি টকাৰ কেলেংকাৰী ৷ তেওঁৰ বিৰুদ্ধে এচ গোচৰ ৰুজু কৰা হৈছিল হাইলাকান্দি আৰক্ষী চকীত ৷
দল-সংগঠনৰ সদস্য সকলে জানিবলৈ দিয়া অনুসৰি তেওঁৰ বিৰুদ্ধে চলি আছিল এই দুৰ্নীতিৰ তদন্ত ৷ কিন্তু তেনে সময়তে আন ঠাইলৈ বদলি কৰা হয় অভিযু্ক্ত বিষয়াগৰাকীক ৷ অভিযুক্তক উপযুক্ত শাস্তি প্ৰদানৰ বাবে দাবী জনাইছে জিলা বিজেপি সংখ্যালঘু মৰ্চাৰ সম্পাদক আনচাৰুল হুছেইন লস্কৰে ৷ তেওঁৰ উল্লেখ কৰা অনুসৰি, জিলাখনত এনে কিছুমান আৰ্থিভাৱে দুৰ্বল পৰিয়ালৰ ছাত্ৰ-ছাত্ৰী আছে যিয়ে তেওঁলোকৰ শিক্ষাৰ খৰচ বহন কৰাৰ ক্ষেত্ৰত এই জলপানিৰ আশাতে ৰৈ থাকে ৷
কিন্তু ৰাজীৱ কুমাৰ ঝাৰ এনে কাৰ্যই সেই ছাত্ৰ-ছাত্ৰী সকলক হতাশ কৰিছে ৷ আনহাতে অসম জাতীয়তাবাদী যুৱ ছাত্ৰ পৰিষদৰ তৰফৰ পৰাও এই কাৰ্যৰ বিৰুদ্ধে তীব্ৰ ক্ষোভ প্ৰকাশ কৰিছে ৷ সংগঠনটোৰ জিলা সম্পাদক গৰাকীয়ে উল্লেখ কৰা অনুসৰি, সমগ্ৰ ঘটনা সন্দৰ্ভত তেওঁলোকে জিলা উপায়ুক্তৰ লগতে অসমৰ শিক্ষামন্ত্ৰী আৰু মুখ্যমন্ত্ৰীক এখন স্মাৰক প্ৰদান কৰিছিল ৷ সংগঠনটোৱে তথ্য সহকাৰে জিলা প্ৰশাসনৰ হাতত অভিযোগ প্ৰদান কৰিছিল বুলিও উল্লেখ কৰে সম্পাদক গৰাকীয়ে ৷ কিন্তু অভিযুক্তক গ্ৰেপ্তাৰ কৰাতো দূৰৰে কথা, তদন্ত চলি থকাৰ সময়তে বিষয়া গৰাকীৰ বদলিক লৈ ক্ষোভিত হৈ পৰিছে সংগঠনৰ সদস্য সকল ৷ অভিযুক্তৰ গ্ৰেপ্তাৰৰ দাবী জনাই অহাৰ সময়তে দেওবাৰে বিভাগীয় কৰ্তৃপক্ষই তেওঁক অন্য ঠাইলৈ বদলি কৰাৰ বাবে কৃষক মুক্তি সংগ্ৰাম সমিতিৰ হাইলাকান্দি জিলাৰ সম্পাদক জাহিৰক উদ্দিন লস্কৰেও তীব্ৰ ক্ষোভ প্ৰকাশ কৰিছে ৷
লগতে পঢ়কঃ বাঁহৰ ভগ্ন সাঁকোৰে যাতায়াতৰ নামত সৰুক্ষেত্ৰীৰ ৰাইজৰ দুৰ্ভোগ
