নুমলীগড়ত হস্তী-মানৱৰ সংঘাত: যুৱকক গছকি আঘাতপ্ৰাপ্ত কৰাৰ দৃশ্য ভাইৰেল

গোলাঘাটৰ নুমলীগড়ত হাতী-মানুহৰ সংঘাতৰ দৃশ্য ভাইৰেল ৷ এটা প্ৰকাণ্ড হাতীয়ে গুৰিয়াই গুৰিয়াই আক্ৰমণ কৰে এজন যুৱ কৃষকক ৷ যুৱকজনক অতি সংকটজনক অৱস্থাত যোৰহাট চিকিৎসা মহাবিদ্যালয় হাস্পতাললৈ প্ৰেৰণ ৷

গোলাঘাট, 2 ডিচেম্বৰ : গোলাঘাটৰ নুমলীগড়ত মঙলবাৰে সৃষ্টি হয় হাতী-মানুহৰ সংঘাত ৷ এটা প্ৰকাণ্ড হাতীয়ে গুৰিয়াই গুৰিয়াই এজন যুৱকক আক্ৰমণ কৰা দৃশ্য ভাইৰেল হৈ পৰিছে ৷

ঘটনা অনুসৰি, নিজৰ খেতিডৰা বচাবলৈ গৈ বন্যহস্তীৰ জাকৰ পৰা ফালৰি কাটি অহা এটা প্ৰকাণ্ড হাতীয়ে লেটেকুজান চাহ বাগিচাৰ কাষৰ পথাৰত আক্ৰমণ কৰি গুৰুতৰভাৱে আহত কৰে ৰামা কৰ্মকাৰ নামৰ যুৱকজনক ৷ যুৱকজনক স্থানীয় বিবেকানন্দ চিকিৎসালয়ত ভৰ্তি কৰোৱাৰ পাচত অতি সংকটজনক অৱস্থাত যোৰহাট চিকিৎসা মহাবিদ্যালয় হাস্পতাললৈ প্ৰেৰণ কৰে ।

ইফালে নিতৌ পকা ধাননি পথাৰত জাক-জাক হাতীয়ে তহিলং কৰিছে শ শ বিঘা পথাৰ । যাৰ ফলস্বৰূপে বিনিদ্ৰ ৰজনী কটাবলগীয়া হৈছে কৃষকে ৷ তীব্রতৰ হৈ পৰা হাতী-মানুহৰ সংঘাতক লৈ কাণ নিদিয়া বন বিভাগৰ বিৰুদ্ধে ক্ষোভ উজাৰিছে স্থানীয় ৰাইজে ৷

লগতে পঢ়ক : কংগ্ৰেছ-এআইইউডিএফৰ মিত্ৰতাই দ্বিতীয় কলি যুগৰ সৃষ্টি কৰিব : অতুল বৰা