গোলাঘাট, 24 মে': বিশ্বজুৰি অব্যাহত আছে কৰ'ণা ভাইৰাছৰ সন্ত্ৰাস ৷ বিশ্বৰ আন বহু দেশৰ লগতে ভাৰততো প্ৰতিদিনেই বৃদ্ধি পাইছে কোভিড-19 ত আক্ৰান্তৰ সংখ্যা ৷ কিন্তু ইয়াৰ মাজতে কোভিড-19 ক প্ৰতিহত কৰা যুঁজখনত নিৰ্ভীক সেনানীহৈ প্ৰতিদিনে ৰাইজৰ সেৱাৰ বাবে কাম কৰি গৈছে চিকিৎসা কৰ্মী সকলৰ লগতে জৰুৰীকালীন সেৱাত নিয়োজিত হৈ থকা হাজাৰ হাজাৰ লোকে ৷ বিশ্বৰ এই অভাৱনীয় পৰিস্থিতিৰ সময়ত ৰাইজক সুৰক্ষা প্ৰদানৰ বাবে দিনে-নিশাই অহৰহ সেৱা আগবঢ়োৱা প্ৰতিজন লোকৰে সু-স্বাস্থ্যৰ কামনা কৰি আৰু কৃতজ্ঞতা জনাই শনিবাৰে চুকাফাৰ প্ৰতিমূৰ্তিৰ তলত 101 গচি বন্তি প্ৰজ্বলন কৰে গোলাঘাট টাই আহোম যুৱ পৰিষদে ৷
এই সময়ছোৱাত নিজৰ জীৱনকো তুচ্ছ জ্ঞান কৰি কৰ্ম ক্ষেত্ৰত আগবঢ়োৱা অনবদ্য সেৱাৰ বাবে সকলো কৰ্মীকে কৃতজ্ঞতা আৰু শুভেচ্ছা জনাই গোলাঘাট টাই আহোম যুৱ পৰিষদে ৷ তেওঁলোকৰ আশা এনে শ্ৰদ্ধাসুলভ মৰম আৰু শুভেচ্ছাই সকলোকে অনুপ্ৰাণিত কৰাই নহয়, নিজা-নিজা দায়িত্বৰ প্ৰতিও অধিক সচেতন কৰিব ৷
লগতে পঢ়কঃ ওদালগুৰিত বৃহৎ পৰিমাণৰ অস্ত্ৰ ভাণ্ডাৰ উদ্ধাৰ
