গোলাঘাট,29 এপ্ৰিলঃ ৰাজ্যবাসীৰ বাবে দুখবৰ । ৰাজ্যৰ এগৰাকী উদীয়মান লেখিকা তুলিকা শইকীয়া আৰু নাই । বিশিষ্ট উপন্যাসিকা, গল্পকাৰ, লেখিকা, নিৱন্ধকাৰ, ২০১৪ চনত মুনীন বৰকটকী বঁটা প্ৰাপ্ত, "চাৰিশাল গোসাঁনীৰ তেজ" নামৰ উপন্যাসৰ স্ৰষ্টা তুলিকা শইকীয়াৰ দেহাৱসান । বহু দিন ধৰি বৃক্ক ৰোগত আক্ৰান্ত হৈ সোমবাৰে মৃত্যুক আকোৱালি লয় বিশিষ্ট লেখিকাগৰাকীয়ে ৷ তুলিকা শইকীয়াৰ অকাল বিয়োগত মৰ্মাহত হৈ পৰে অসংখ্য গুণমুগ্ধ ।
তুলিকা শইকীয়া এনে এগৰাকী লেখিকা আছিল যাৰ কলমেৰে নিগৰিত হৈছিল বাস্তৱ সমাজৰ জীয়া ছবি । তেঁওৰ প্ৰথমখন উপন্যাসৰ বাবে মুনিন বৰকটকী বঁটা লাভ কৰিবলৈ সক্ষম হৈছিল । যাৰ লিখনিয়ে বৌদ্ধিক জগতখনত সাঁচ বহুৱাই যাবলৈ সক্ষম হয় । মৃত্যুৰ সময়ত আধৰুৱা হৈ ৰ'ল তেঁওৰ মোৱামৰীয়া বিদ্ৰোহ বুৰঞ্জীমূলক উপন্যাস ৷ মৃত্যুৰ সময়ত নিজ স্বামী আৰু এগৰাকী কন্যা সন্তান এৰি থৈ যায় লেখিকাগৰাকীয়ে ৷ উল্লেখ্য যে , তুলিকা শইকীয়াৰ কন্যা স্ৰোতশ্ৰিনী তামুলীয়েও মাকৰ পদাংক অনুসৰণ কৰি এগৰাকী সু লেখিকা হিচাপে প্ৰতিষ্ঠিত হৈছে ।
