নিউজ ডেস্ক, 28 অক্টোবৰঃ ৰাজ্যৰ বিভিন্ন ঠাইত অব্যাহত আছে বাঘৰ আতংক ৷ ইয়াৰ মাজতে খুমটাইতো বাঘে চলাইছে সন্ত্ৰাস ৷ শেহতীয়াকৈ খুমটাইৰ এজন ব্যক্তিক আক্ৰমণ কৰাৰ ঘটনাই সৃষ্টি কৰিছে তীব্ৰ তাঞ্চল্য ৷ বাঘৰ আক্ৰমণত আহত হয় খুমটাইৰ কেৰেলাচুকৰ জিতু গগৈ নামৰ ব্যক্তিজন ৷ ব্যক্তিজনে নিজৰ চাহ বাগান চাফা কৰি থকা অৱস্থাতে আক্ৰমণ কৰে এটা নাহৰফুটুকীয়ে ৷ ঘটনা সংঘটিত হোৱাৰ লগে লগে উক্ত স্থানত এক হুলস্থুলীয়া পৰিৱেশৰ সৃষ্টি হয় ৷ ব্যক্তি জনক উদ্ধাৰৰ বাবে স্থানীয় লোকে বাঘটোক আক্ৰমণ কৰাৰ ফলত মৃত্যুমুখত পৰে বাঘটো ৷
উল্লেখ্য যে, বিগত কেইবাদিন ধৰি এই অঞ্চলত কেইবাটাও বাঘে ছাগলী গৰু আদি আক্ৰমণ কৰি আহিছে ৷ ঘটনাস্থলীত গোলাঘাট বন বিভাগৰ লোক উপস্থিত হৈ মৃত বাঘটো মৰণোত্তৰ পৰীক্ষাৰ বাবে লৈ যায় ৷ স্থানীয় লোকসকলে গাঁওখনত কেইবাটাও বাঘ থকাৰ সন্দেহ কৰি বনবিভাগক এটা পিঞ্জৰা দিবলৈ অনুৰোধ জনাইছে ৷
আনহাতে, মহানগৰীতো পুনৰ নাহৰফুটুকীৰ আতংক ৷ বিৰুবাৰীৰ কৃষ্ণ বাহাদুৰ নামৰ লোক এজনৰ ঘৰত ত্ৰাসৰ সৃষ্টি কৰিছে নাহৰফুটুকীয়ে ৷ আন্ধাৰ হ'লেই নাহৰফুটুকীৰ গোজৰণিত আতংকিত হৈ পৰে বিৰুবাৰীবাসী ৷ প্ৰতিদিনেই অঞ্চলটোত মুক্ত বিচৰণ কৰে নাহৰফুটুকীয়ে ৷ চি চি টিভিত বন্দী হয় নাহৰফুটুকীৰ মুক্ত বিচৰণৰ দৃশ্য ৷ খাদ্যৰ সন্ধানত বনাঞ্চলৰ পৰা প্ৰায়েই জন অৰণ্যলৈ নামি আহে নাহৰফুটুকী ৷ বন বিভাগক এই বিষয়ত ব্যৱস্থা গ্ৰহণ কৰিবলৈ অনুৰোধ জনাইজে অঞ্চলটোৰ ৰাইজে ৷
