নাৰ্চৰ অৱহেলাৰ বাবেই মৃত্যু যুৱকৰ

গোলাঘাটত নাৰ্চৰ মইমতালিৰ বাবেই এজন যুৱকৰ মৃত্যু হোৱাৰ অভিযোগ পৰিয়ালৰ ৷ চিকিৎসকে নিৰ্দেশ দিয়াৰ পিছতো যুৱক জনক নাৰ্চে চিকিৎসা নকৰাৰ বাবে মৃত্যু হোৱা বুলি গুৰুতৰ অভিযোগ তুলিছে পৰিয়ালে ৷

গোলাঘাট, 16 আগষ্টঃ পুনৰ শ্বহীদ কুশল কোঁৱৰ অসামৰিক চিকিৎসালয়ৰ নাৰ্চৰ ময়মতালিৰ বাবেই এজন যুৱকৰ মৃত্যু হোৱাৰ অভিযোগ পৰিয়াল তথা স্থানীয় লোকৰ ৷

উল্লেখ্য যে, গোলাঘাট তপন নগৰৰ ৰাজ মজুমদাৰ নামৰ এজন যুৱকৰ অতিপাত পেটৰ বিষ হোৱাৰ বাবেই গোলাঘাট শ্বহীদ কুশল কোঁৱৰ অসামৰিক চিকিৎসালয়লৈ পৰিয়ালে লৈ গৈছিল ৷ ইফালে চিকিৎসকে যুৱকজনক চাই চিটি ঔষধ-বেজি লিখি দিছিল চিকিৎসাৰ বাবে ৷

কিন্তু অতি দুখৰ বিষয় যে, চিকিৎসকে পৰামৰ্শ দিয়াৰ পিছতো চিকিৎসালয় খনৰ নাৰ্চে জৰুৰী কালীন ভাবে ৰাজ মজুমদাৰৰ ক'ভিদ টেষ্ট কৰোৱাৰ পিছত হে চিকিৎসা কৰা হ'ব বুলি জনায় ৷ কিন্তু যুৱক জনৰ অৱস্থা অতি সংকট জনক আছিল বাবেই নাৰ্চক চিকিৎসা প্ৰদান কৰিবলৈ বাৰম্বাৰ অনুৰোধ কৰাৰ পিছতো নাৰ্চে কোনো ধৰণৰ চিকিৎসা প্ৰদান নকৰিলে বুলি গুৰুতৰ অভিযোগ তোলে পৰিয়ালে ৷ অৱশেষত চিকিৎসা অবিহনেই যুৱক জনৰ মৃত্যু হোৱাৰ অভিযোগ কৰে পৰিয়াল তথা স্থানীয় লোক সকলে ৷

উল্লেখযোগ্য যে, ইতিমধ্যে জৰুৰী কালীন অৱস্থাৰ বাবে চিকিৎসালয়ত কৰ্মৰত নাৰ্চক ৰেপিড টেষ্টৰ প্ৰশিক্ষণ দিয়া হৈছিল যদিও স্বাস্থ্য বিভাগৰ নীতি-নিৰ্দেশনাক গুৰুত্ব নিদি মইমতালি ভাবে নাৰ্চে দায়িত্ব পালন কৰি আছে বুলি অভিযোগ কৰে ৰাইজে ৷ উক্ত ঘটনাটোৰ বাবে এতিয়া ক্ষুব্ধ হৈ পৰিছে পৰিয়ালৰ লগতে স্থানীয় ৰাইজ ৷

লগতে পঢ়ক- নিজ পিতৃ-মাতৃক মৰিয়াই হত্যা কৰিলে পুত্ৰই