গোলাঘাট, 11 ছেপ্টেম্বৰ : অইল ইণ্ডিয়াৰ পাইপ লাইনৰে খাৰুৱা তেল নিৰ্গত হৈ বিস্তৰ কৃষি ভূমি ক্ষতি হৈছে গোলাঘাট জিলাৰ কমাৰগাঁৱৰ সমীপৰ তামুলীপথাৰত। খাৰুৱা তেল পৰিবাহী এডাল পাইপ কিছুদিনৰ আগতে অইল ইণ্ডিয়া কৰ্তৃপক্ষই স্থাপন কৰিছিল । তামুলীপথাৰ অঞ্চলৰ কৃষিপথাৰ মাজেৰে যোৱা পাইপ ডালেৰে বৰ্তমান খাৰুৱা তেল নিৰ্গত হৈ অঞ্চলটোৰ কৃষি ভূমি বিনষ্ট কৰিছে । কৃষক সকলৰ শালিধানৰ খেতি বিস্তৰ ক্ষতি সাধন হোৱাত এতিয়া মূৰে-কপালে হাত দিছে কৃষক সকলে ।
নতুনকৈ স্থাপন কৰা খাৰুৱা তেল পৰিবাহী পাইপডালৰ পৰা বুৰবুৰণি উঠা দেখি আতংকিত হৈছে স্থানীয় ৰাইজ । তেল পৰিবাহী পাইপ ডাল অইল ইণ্ডিয়া কৰ্তৃপক্ষই বিসংগতিপূৰ্ণ ভাৱে স্থাপন কৰাৰ ফলত সংঘটিত হৈছে এনে কাণ্ড । যাৰ পৰিপ্ৰেক্ষিতত কাষৰীয়া কৃষি ভূমিৰ শালি ধানৰ বহু খেতি নষ্ট হোৱা দেখা গৈছে । কৃষি ভূমি নষ্ট হোৱাত এতিয়া অইল ইণ্ডিয়াৰ বিৰুদ্ধে জাঙুৰ খাই উঠিছে কৃষক, টাই আহোম ছাত্ৰ সন্থাৰ লগতে একাংশ ছাত্ৰ সংগঠনে ।
অইল ইণ্ডিয়া কৰ্তৃপক্ষৰ চূড়ান্ত গাফিলতিৰ বাবে কৃষক সকলৰ নষ্ট হোৱা কৃষি ভূমিৰ উচিত ক্ষতিপূৰণ দিবলৈ দাবী জনাইছে কৃষকসকলে । উল্লেখযোগ্য যে, সময় থাকোঁতেই যদি অইল ইণ্ডিয়া লিমিটেডে এই গুৰুত্বপূৰ্ণ বিষয়টো সমাধান নকৰে, তেন্তে এই স্থান যে দ্বিতীয় বাঘজানলৈ ৰূপান্তৰিত নহ'ব তাক নুই কৰিব নোৱাৰি ।
লগতে পঢ়ক : পৰিবহন আয়ুক্ত সচিবৰ কাৰ্যালয়ত গাড়ী চালকৰ প্ৰতিবাদ
