গোলাঘাট,16 আগষ্ট: গোলাঘাটৰ বৰফলং চাহ বাগিচাত সংঘটিত হৈছে এক অঘটন ৷ বাগিচাখনৰ ওপৰটেঙাত দেওবাৰে নিশা সংঘটিত হয় এক লোমহৰ্ষক হত্যাকাণ্ড ৷ জানিব পৰা মতে, নিহত ব্যক্তি জনৰ নাম বিকাশ চবৰ (৩০) ৷
পৰিয়াল কেন্দ্ৰিক সংঘাত আৰু অত্যাধিক মদ্যপানেই কাল হ’ল বিকাশ চবৰৰ বাবে ৷ অভিযোগ অনুসৰি, পৰিয়াল কেন্দ্ৰিক সংঘাত আৰু অধিক মদ্যপানৰ ফলত সংঘটিত হয় এই হত্যাকাণ্ড । অভিযোগ অনুসৰি, একেখন বাগিচাৰে অনিল চবৰ নামৰ এজন ব্যক্তিয়ে হত্যা কৰে বিকাশ চবৰক ৷
দেওবাৰে নিশা বিকাশ চবৰৰ ঘৰৰ চোতালতে বিকাশ চবৰ আৰু অনিল চবৰৰ সৈতে হঠাৎ তৰ্কা-তৰ্কি হয় ৷ পৰৱৰ্তী সময়ত বাকযুদ্ধই হতাহতিৰ ৰূপ লয় ৷ পৰিস্থিতি বিষম দেখি বিকাশ চবৰৰ পৰিয়ালৰ লোক বাহিৰলৈ ওলাই আহে ৷
লগতে পঢ়ক: প্ৰেমত বাধা দিয়াৰ বাবেই বায়েকে হত্যা কৰিলে ভায়েকক !
তাৰ পাচতেই দুটা ফৈদৰ মাজত সৃষ্টি হয় এক উত্তপ্ত পৰিস্থিতিৰ । অভিযোগ অনুসৰি, অনিল চবৰে বিকাশ চবৰক হত্যা কৰাৰ পৰৱৰ্তী সময়ত অভিযুক্ত অনিল চবৰৰ পৰিয়ালৰ লোকে মৃত বিকাশ চবৰৰ পত্নী জোনতি চবৰ, বলৰাম চবৰ আৰু ৰাধেশ্যাম চবৰকো আক্ৰমণ কৰে ৷ যাৰ ফলত গুৰুতৰভাৱে আহত হয় জোনতি চবৰ, বলৰাম চবৰ আৰু ৰাধেশ্যাম চবৰ ৷ পৰৱৰ্তী সময়ত ঘটনাস্থলীত উপস্থিত হয় খুমটাই আৰক্ষী ৷ আৰক্ষীৰ উপস্থিতিত পৰিস্থিতি কিছু নিয়ন্ত্ৰণলৈ আহে ৷ ইফালে এই ঘটনাত আহত লোকসকলক নিশাই কুশল কোঁৱৰ অসামৰিক চিকিৎসালয়ত ভৰ্তি কৰোৱা হয় ৷
আনহাতে, এই হত্যাকাণ্ডৰ লগত জড়িত মূল অভিযোক্ত অনিল চবৰক আটক কৰিছে আৰক্ষীয়ে ৷ লগতে এই হত্যাকাণ্ডৰ লগত জড়িত থকাৰ সন্দেহত সুনীল চবৰ, ৰবিন চবৰ আৰু সন্তোষ চবৰ নামৰ আন তিনিজন লোককো আটক কৰিছে খুমটাই আৰক্ষীয়ে ৷
খুমটাই আৰক্ষীয়ে সদৰি কৰা অনুসৰি, এই ঘটনাত ব্যৱহৃত এখন দা আৰক্ষীয়ে জব্দ কৰিবলৈ সক্ষম হৈছে ৷ এই ঘটনাৰ সন্দৰ্ভত আৰক্ষীয়ে আৰম্ভ কৰিছে তদন্ত ৷ তদন্তৰ অন্ততহে সমগ্ৰ তথ্য পোহৰলৈ আহিব ৷ এই ঘটনাক কেন্দ্ৰ কৰি অঞ্চলটোত বিৰাজ কৰিছে চাঞ্চল্যই ৷
