গোলাঘাট, 12 চেপ্তেম্বৰঃ অসম চাহ শ্ৰমিক কৰ্মচাৰী ভৱিষ্যনিধি সংগঠনৰ দ্বাৰা লোকনায়ক অমিয় কুমাৰ দাস সোঁৱৰণী বঁটা প্ৰদান ৷ সংস্থাৰ গোলাঘাট সংমণ্ডলে জিলাখনৰ 15 গৰাকী কৃতিমানক প্ৰদান কৰে এই বঁটা ৷
অসম চৰকাৰৰ শ্ৰম মন্ত্ৰালয়ৰ অধীনৰ অসম চাহ শ্ৰমিক কৰ্মচাৰী ভৱিষ্যনিধি সংগঠনৰ 65 সংখ্যক প্ৰতিষ্ঠা দিৱস উপলক্ষে অনুষ্ঠিত হৈ যায় শীৰ্ষক বঁটা প্ৰদান অনুষ্ঠান ৷ বঁটা প্ৰদান অনুষ্ঠানত গোলাঘাটৰ বিধায়িকা অজন্তা নেওগৰ লগতে গোলাঘাট পৌৰসভাৰ পৌৰপতি জুৰী দাস ৰাজখোৱা, অসম চাহ মজদুৰ সংঘৰ গোলাঘাট জিলাৰ সভাপতি ঘণশ্যাম বাঢ়ৈৰ লগতে বহুটো বিশিষ্ট ব্যক্তি উপস্থিত থাকে ৷
অনুষ্ঠানত জিলাখনৰ 15 গৰাকীকৈ মেধাৱী কৃতিমানক প্ৰদান কৰা লোকনায়ক অমিয় কুমাৰ দাস সোঁৱৰণী বঁটা ৷ আনহাতে গুৱাহাটীত কেন্দ্ৰীয়ভাৱে উদযাপন কৰা হয় সংস্থাৰ প্ৰতিষ্ঠা দিৱস ৷ এই অনুষ্ঠানতে উপস্থিত থাকিব ৰাজ্যৰ মুখ্যমন্ত্ৰী সৰ্বানন্দ সোণোৱালে ৷ গুৱাহাটীস্থিত শংকৰদেৱ কলাক্ষেত্ৰত ৰাজ্যৰ মুখ্যমন্ত্ৰী সৰ্বানন্দ সোণোৱালে সদৌ অসমভিত্তিক দ্বিতীয় স্থান দখল কৰা এগৰাকী শিক্ষাৰ্থীক বঁটা প্ৰদান কৰিব ৷ এই বঁটাত থাকিব নগদ ত্ৰিশ হাজাৰ টকাৰ লগতে এখন প্ৰমাণপত্ৰ ৷ আনহাতে গোলাঘাটত প্ৰদান কৰা বঁটাত আটাইকেইগৰাকী শিক্ষাৰ্থীকে নগদ দুহেজাৰ টকাকৈ আগবঢ়োৱাৰ লগতে এখনকৈ প্ৰমাণপত্ৰ প্ৰদান কৰা হয় ৷