টীয়ক, 28 জুনঃ টীয়কত জনস্বাস্থ্য কাৰিকৰী বিভাগত চৰকাৰী ধন লুণ্ঠনৰ অভিযোগ উত্থাপন হৈছে ৷ অভিযোগ অনুসৰি, জনস্বাস্থ্য কাৰিকৰী বিভাগৰ যোৰহাট উপ-সংমণ্ডল কাৰ্যালয়ৰ একাংশ কৰ্মচাৰীয়ে, পানী যোগান আঁচনিৰ অন্তৰ্ভুক্ত মেৰামতিৰ কামৰ বাবে আৱণ্টিত ধন আত্মসাৎ কৰিছে ৷ আনহাতে এতিয়ালৈ পূৰ্বতে মেৰামতি কৰিবলগীয়া বহু পানী যোগান আঁচনিসমূহো সম্পূৰ্ণ হৈ উঠা নাই ৷
স্থানীয় লোকে উল্লেখ কৰা অনুসৰি, টীয়ক সমষ্টিৰ সুন্দৰপুৰৰ পানী যোগান আঁচনিৰ চৌহদত প্ৰায় চাৰি বছৰ পূৰ্বে বৃহৎ পৰিমাণৰ টকা ব্যয়ৰে নিৰ্মাণ কৰা পানীৰ ৰিজাৰ্ভাৰ আজিও ব্যৱহাৰৰ অনুপযোগী ৷ অভিযোগ মতে, ঠিকাদাৰে আঁচনিৰ ধন মুকুলাই অনা স্বত্বেও এই পৰ্যন্ত আধৰুৱা হৈ থাকিল মেৰামতিৰ কাম ৷ চাৰি বছৰৰ পাচত আম এগৰাকী ঠিকাদাৰে আধৰুৱা কাম সম্পূৰ্ণ কৰিবলৈ আহে যদিও, এই বিষয়ে জ্ঞাত নহয় স্থানীয় পৰিচালনা সমিতিৰ বিষয়ববীয়াসকল ৷ পানী যোগান আঁচনিৰ নিৰ্মীয়মাণ প্ৰকল্পসমূহত সম্প্ৰতি অতি নিম্ন মানৰ কাম কৰাৰ অভিযোগ উত্থাপন হৈছে ৷
লগতে পঢ়কঃ কেমেৰাৰ সমুখতে উটি গ'ল দলং
