কেনে আছে ওড়িশাত অধ্যয়নৰত গোলাঘাটৰ ছাত্ৰী? চিন্তিত পৰিয়াল

ওড়িশাত ফেনীয়ে তাণ্ডৱ চলোৱাৰ সময়তে গভীৰ আশংকাত ভুগিবলগীয়া হৈছে গোলাঘাটৰ এটা পৰিয়াল ৷ ফেনীৰ ফলত ভুৱনেশ্বৰত অধ্যয়নৰত গোলাঘাটৰ এগৰাকী ছাত্ৰীৰ সৈতে যোগাযোগ কৰিব নোৱৰাত ছাত্ৰীগৰাকীৰ পৰিয়াল চিন্তিত হৈ পৰিছে ৷

গোলাঘাট ,4মে': ফেনীৰ আতংকত এতিয়া আতংকিত গোলাঘাটৰ এটা পৰিয়াল । ওড়িশাৰ ভুৱনেশ্বৰত অধ্যয়ন কৰি থকা গোলাঘাটৰ এগৰাকী মেধাৱী ছাত্ৰীৰ সৈতে শুকুৰবাৰৰে পৰা যোগাযোগ বিচ্ছিন্ন হৈ আছে পৰিয়ালৰ । অনন্যা শইকীয়া নামৰ গোলাঘাট বেঙেনাখোৱাৰ ছাত্ৰীগৰাকীৰ পৰিয়াল এতিয়া গভীৰ অনিশ্চয়তাত । ভুৱনেশ্বৰৰ REGIONAL INSTITUTE OF EDUCATION ৰ চতুৰ্থ ষান্মাসিকৰ ছাত্ৰীগৰাকী থকা হোষ্টেলত শুকুৰবাৰে চলিছিল ফানীৰ তাণ্ডৱ । যাৰ বাবে শিক্ষয়িত্ৰী মাতৃ নৱমল্লিকা ফুকন শইকীয়া আৰু ব্যৱসায়িক পিতৃ দীপক শইকীয়াকে ধৰি পৰিয়ালটোৰ সকলোৱে এতিয়া অনন্যাক লৈ চিন্তিত হৈ পৰিছে ।

উল্লেখ্য যে শুকুৰবাৰে পুৱা প্ৰায় ৮-৩০ বজাৰ পৰা আৰম্ভ হোৱা ফানীৰ তাণ্ডৱত ছাত্ৰীগৰাকীৰ হোষ্টেলটোৰৰ বহু ক্ষয়-ক্ষতি হয় যদিও ছাত্ৰ-ছাত্ৰীসকলৰ কোনো ডাঙৰ অঘটন ঘটা নাই বুলি জানিব পাৰিছে পৰিয়ালটোৱে । আনহাতে শুকুৰবাৰে মাতৃৰ সৈতে এবাৰ ম'বাইলত যোগাযোগ হৈছিল যদিও শনিবাৰে কোনো যোগাযোগ নোহোৱাত গভীৰ আশংকাত থাকিব লগা হৈছে পৰিয়ালটো ।