গোলাঘাট, 10 ছেপ্টেম্বৰ : কাৰ্বি আংলঙৰ কাকচাং কাইফলাংচু জলপ্ৰপাতত সলিল সমাধি ঘটা উদীয়মান ক্ৰিকেটাৰ বিভাকৰ নাগলৈ শ্ৰদ্ধাঞ্জলি জ্ঞাপন সতীৰ্থ খেলুৱৈ আৰু অনুৰাগীৰ । গোলাঘাট ক্ৰীড়া সন্থাৰ খেলপথাৰত বন্তি আৰু মম জ্বলাই শ্ৰদ্ধাঞ্জলি জ্ঞাপন কৰে ক্ৰীড়া সন্থাৰ বিষয় ববীয়া আৰু সতীৰ্থই ।
বিভাকৰ নাগক লৈ বহু সপোন দেখিছিল গোলাঘাট ক্ৰীড়া সন্থাই । ১৭ বছৰ আৰু ১৯ বছৰ অনুৰ্ধ্বত অসমৰ হৈ প্ৰতিনিধিত্ব কৰিছিল যুৱ খেলুৱৈ গৰাকীয়ে । BCCI ৰ কেইবাটাও ৰাষ্ট্ৰীয় পৰ্যায়ৰ ক্ৰিকেট প্ৰশিক্ষণ শিবিৰত অংশগ্ৰহণ কৰাৰো সুযোগ পাইছিল নাগে । গোলাঘাট ক্ৰীড়া সন্থাৰ সপোন আছিল ভৱিষ্যতে ৰঞ্জী ট্ৰফী খেলাৰ সুযোগ পাব বিভাকৰ নাগে । কিন্তু নিয়তিয়ে সকলোকে নিৰাশ কৰি কাঢ়ি নিলে উদীয়মান ক্ৰিকেট খেলুৱৈ গৰাকীক ।
নাগৰ মৃত্যু গোলাঘাট তথা অসমৰ ক্ৰীড়া জগতৰ বাবে এক অপূৰণীয় ক্ষতি । সকলোৱে ভগৱন্তৰ ওচৰত বিভাকৰ নাগৰ আত্মাৰ চিৰশান্তিৰ বাবে প্ৰাৰ্থনা জনাইছে ।
লগতে পঢ়ক : ৰাজ্যৰ প্ৰতিবন্ধী সকলক চৰকাৰে প্ৰতাৰণা কৰি অভিলেখ গঢ়িছে
